Osydan alty jyl buryn Shıeli aýdanynda ashylǵan «Gejýba Shıeli sement» kompanııasy tabysty jumys istep turǵan iri kásiporynnyń biri. Qytaılyq korporasııamen birlesip, ındýstrııalandyrý kartasyna engizilgen óndiris ornynyń jobalyq quny – 64 mlrd teńge. Jylyna orta eseppen 1 mln tonna sement óndiretin kompanııa ónimi el óńirlerimen qatar shetelde de suranysqa ıe.
Kompanııa shyǵaratyn tamponajdy sement qurylys, munaı-gaz jáne ýran óndirisinde keńinen qoldanylady. Qajetti shıkizattyń deni Shıeli aýdanynan alynyp, qalǵany basqa oblystardan jetkizilip tur.
«Jylyna bir márte ǵana jóndeý jumysyna toqtaımyz. Qalǵan ýaqytta úzdiksiz, táýligine 24 saǵat jumys isteımiz. О́ndiris tolyq avtomattandyrylǵan. Syrttaǵy aqaýdy bárin baqylap otyratyn ortalyq basqarý pýltinen anyqtap, jóndeý jumysyn júrgize beremiz. Zaýyttyń ózinde 250, merdiger kompanııalarda 400-ge jýyq adam jumys isteıdi. Mamandardyń bári derlik jergilikti azamattar», deıdi zaýyttyń ortalyq basqarý bóliminiń basshysy Tabıǵat Ábekov.
Maman demekshi, zaýyt jumysyn bastaǵan jyly jergilikti 100 jas Qytaı elindegi zaýytta oqyp kelipti. Artynsha ınvestorlar Shıeli ındýstrııalyq-agrarlyq kolledji bazasynda taǵy 100 maman daıarlaýdy qolǵa alǵan. Qazir maman daıarlaý baǵytynda M.Áýezov atyndaǵy Ońtústik Qazaqstan ýnıversıtetimen baılanysty nyǵaıtqan. Zaýyt osy oqý ornymen birigip, oqý oryndary men óndiriste qoldaný úshin sement tehnologııasy týraly kitap ta shyǵaryp jatyr.
Shet memleketter arasynan zaýyt ónimin Qyrǵyzstan, Túrikmenstan, Aýǵanstan men Tájikstan kóbirek alady. Bastapqyda tutynýshylar qatarynda О́zbekstan da bar edi. Qytaılyq korporasııa 3-4 jyl buryn ózbek eline de osyndaı óndiris ornyn salyp, qazir olar Ortalyq Azııa boıynsha osy saladaǵy iri kásiporyn atanyp otyr.
«Shıkizattan ónimge aınalǵansha bar jumys osy ortalyqtan basqarylady. Otandyq mamandar qazir sheteldikterdiń ornyn basty. Jumys turaqty, tabys oıdaǵydaı bolǵasyn óndiris ornynan ketetinder az. Ortasha aılyq 250 myń teńgeden joǵary. Byltyr jalaqyny 10%-ǵa kóterdi. О́nim baǵasy qymbattaǵandyqtan, bıyl da aılyq ósedi dep otyrmyz. Sondyqtan osy zaýyt jumysshysy bolýǵa yntalylar kóptep sanalady. Osylaısha, elimizdegi jalǵyz tamponajdy sement óndiretin zaýyt jumysyn óz jigitterimiz dóńgeletip áketti. О́nim sapaly bolǵandyqtan jyl saıyn tutynýshylar qatary da artyp keledi», deıdi jalpy basqarý bóliminiń basshysy Ersin Bazylbek.
Oblystyq kásipkerlik jáne ónerkásip basqarmasy men óńirlik kommýnıkasııa qyzmeti Jumysshy mamandyqtary jylyna oraı uıymdastyrǵan kóshpeli brıfıngte Shıeli aýdanynda kásipkerlikti damytýda óndiris salasyna den qoıylǵanyn baıqadyq. Aldaǵy ýaqytta aýdanda jalpy quny 70 mlrd teńgege jýyq jobalar júzege asyrylady. Bulardyń arasynda jeke ınvestısııa úlesi basym.
Ázirge aýdan óndirisiniń kósh basynda ónimi eldiń barlyq óńirine tasymaldanyp, qurylys ındýstrııasyna keńinen paıdalanylyp otyrǵan «Gejýba Shıeli sement» kompanııasy tur.
Qyzylorda oblysy,
Shıeli aýdany