QYZYLORDA. 6 mamyr. Qyzylordada ishki ister organdarynda abyroıly qyzmet etken ardagerlerge, onyń ishinde soǵys ardagerlerine arnalǵan mármár taqtanyń saltanatty túrde ashylý rásimi ótti. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlaıdy.
Saltanatty rásimge ishki ister organdarynyń Uly Otan soǵysy ardagerleri, soǵys ardagerleriniń týystary, Qyzylorda oblystyq ardagerler keńesiniń tóraǵasy, departament basshylyǵy jáne jeke quram qatysty.
Shara barysynda Ishki ister mınıstri, polısııa general-polkovnıgi Qalmuhanbet Qasymovtyń marapattaý jaıly buıryǵy resmı túrde oqylyp, mınıstr buıryǵymen Uly Otan soǵysy ardageri Islam Ábishbekov Qurmet gramotasyna ıe boldy. Qyzylorda oblystyq IID bastyǵy, polısııa polkovnıgi J.Súleımenovtiń buıryǵymen departamenttiń 15 ardageri, sondaı-aq óz qyzmettik mindetterine adaldyqpen qarap, quqyqtyq tártip pen qaýipsizdikti qamtamasyz etýde erekshe kózge túsken departamenttiń birneshe qyzmetkeri marapattaldy.
Sonan soń ishki ister organdarynda abyroıly qyzmet atqarǵan Uly Otan soǵysynyń 102 ardageriniń aty jazylǵan mármár taqtanyń ashylý rásimi ótti. Eskertkishti Uly Otan soǵysynyń ardageri Mahambet Berjanov pen tyl eńbekkeri Pirimbet Baıtoqaev ashty. Budan keıin jınalǵandar 1 mınýt únsizdik jarııalap, soǵysta qaza bolǵandardy eske alyp, rýhtaryna taǵzym etti.
Is-shara eskertkishke gúl shoqtaryn qoıýmen qorytyndylanyp, shara sońynda kelgen qonaqtar estelik sýretke tústi. Sonymen qatar, ardagerlerdiń qurmetine merekelik dastarqan jaıylyp, konserttik baǵdarlama qoıyldy.
Erjan Baıtiles.
Derek, sýret: egemen.kz.