Aqsý qalasynda ejelgi qazaq saltyna negizdelgen Qymyzmuryndyq merekesi keńinen atap ótildi.
Merekeniń shymyldyǵyn qazaqtyń ulttyq «Qosbasar» bıimen «Aıgólek» bı ansambli ashty. Keıin S.Dónentaev atyndaǵy mádenıet saraıynyń uıymdastyrýymen jergilikti ónerpazdar men «Asyl mura-Aqsý» qoǵamdyq birlestigi, «Qazaq analary – dástúrge jol» respýblıkalyq qoǵamdyq birlestiginiń ájeleri teatrlandyrylǵan Qymyzmuryndyqtyń kórinisin kórsetti.
Merekege Aqsý qalasyna qarasty alty aýyldyq okrýginiń belsendi, sheber, ónerpaz turǵyndary atsalysyp, qonaqtarǵa qazaq salt-dástúriniń atmosferasyn syılady.
– Ár aýyl 20 lıtr qymyz ben baýyrsaq ákeldi. Qala tarapynan 40 lıtr qymyz daıyndalyp, 30 kılo baýyrsaq pisirildi. Paıdaly ári emdik qasıeti bar sýsyn men ystyq baýyrsaqtar turǵyndarǵa taratyldy. Biraq eń basty maqsat – qaryn toıdyrý emes, jańǵyrtylǵan dástúrdi kórsetý boldy, – deıdi Aqsý qalasynyń mádenıet jáne tilderdi damytý bóliminiń basshysy Medǵat Manapov.
Bıe sútiniń adam aǵzasyna asa paıdaly ekeni málim. Dárýmenge baı qymyzdyń ázirlený joldary da ártúrli. Ásirese Arqanyń bal tatyǵan qymyzyn ystyqta shólińdi qandyryp ishkenge ne jetsin! Bir qyzyǵy, búginde Ertis-Baıan óńirin meken etken ártúrli ult ókilderi úshin qymyz dostyq sýsynyna aınalǵandaı. Onyń qasıetin, paıdasyn olar joǵary baǵalaıdy. Jazdyń alǵashqy kúnderinde ótetin Qymyzmuryndyqty asyǵa kútip, arqa-jarqa bolyp qalatyny da sodan.
– Qymyzmuryndyq degenimiz – mamyrdyń aıaǵy, maýsymnyń bas jaǵynda jasyl shóp ósip kele jatqanda bıelerdi baılap, alǵashqy qymyz ishýdiń rásimi. Bıe súti – densaýlyqqa eń qajetti, kerek dárýmen. Qymyzdyń túr-túri bar. Ashy qymyz dep 4-5 kún turyp qalǵan qymyzdy aıtady. Al bal qymyzǵa tátti zattar qosady, – deıdi «Qazaq analary – dástúrge jol» respýblıkalyq qoǵamdyq birlestiginiń Aqsýdaǵy tóraǵasy Shámshııa Qusaıynova.
Pavlodar oblysy,
Aqsý qalasy