Etjaqyn týys Bákir aqsaqaldyń nemeresi shańyraq kóterip, toı jasaǵan. Aq túıeniń qarny jarylǵan qýanysh. Otaý ıesi bolyp jatqan azamat ta birazǵa deıin salt basty, sabaý qamshyly bolyp júrip aldy. Kópten kútken súıinishti jaı bolǵan soń, Bákir aqsaqal shala búlinip, bar jıǵanyn shashyp, atap ótýge nıettengen.
Belgilengen kúni bardyq. 28 dastarqan. Bir ústelde 12 adamnan otyrǵanda 336 adam. Kókshetaý úshin aýqymdy toı. Jumys kúni, saǵat tórtke shaqyrǵan. Aqsaqaldan uıat bolar dep ýaqtyly bardyq. Barǵanymyzdy qaıteıin, segizge deıin kúttik. Jaı otyrmaıynshy dep tekke ketken tórt saǵatty 336 adamǵa kóbeıttim. Zaıa ketken 1 344 saǵat – adam ǵumyry.
«Osy ýaqytta qytaılar qansha zat istep shyǵarar edi, – dedi bizden soń kelgen eski quda Qalqaman, – ýaqytty qadirleýdi qashan úırener ekenbiz».
Qas qaraıa toı bastalǵan. Jar-jarymen, betashary bir saǵat ýaqyt aldy. Asaba birinshi ústelge jeke sóz bergen, sodan soń tórt ústeldi qosyp. Ár ústelde 12 adamnan otyrǵanda tilek aıtýǵa 48 kisi bir-aq shyǵady. 48 kisi bir mınýttan sóılegende, 48 mınýt birin-biri qaıtalaıtyn jattandy lepes. Shyǵýy bar, sýretke túsýi bar, qaıtyp ornyna otyrýy bar. Qanshama ýaqyt?
Álden soń oıyn bastaldy. Asaba ortaǵa jastary jer ortasynan asqan on jigitti shyǵardy. Meıramhananyń qabyrǵasyna ilingen, jarty álemdi alyp jatqan ekrannan bıshilerdiń beınesi kórindi. Oıynǵa qatysýshylar osy bıshilerdiń bıin qaıtalaýy kerek. Ekrandaǵy bıshiler jerge jatyp bıledi. Bizdiń aǵaıyn da. Qozy qaryn «baılaǵandarǵa» qıyn eken. Shalshyqtyń shetindegi baqa ispetti, tarbıyp jatyr.
– Qap, – dedi janymda otyrǵan qonaqtyń biri, – myna edende myń san adam manadan árli-berli júrdi emes pe? Kúlge aýnaǵan taýyqtaı qylǵan munysy nesi? Toıǵa adam baryn kıip, baılaýyn taǵyp degendeı, sándenip keledi emes pe? Myna jigitterde de es joq eken.
Asaba da jalyǵar emes, aıtqanyna kónip, aıdaǵanyna júrgen top jigitti aldyna salyp myń qoı aıdaǵan baqtashydaı oraǵytyp júr. Álden soń qurmet kórseteıik dedi. Esebi odaǵaı kórinisti kórip otyrǵan halyq dýyldatyp qol soǵyp, qoldaýy qajet eken. Oń jaq dep aıǵaı saldy. Oń jaq qatardaǵy 14 dastarqanda osharylyp otyrǵan támam jurt qyrdan jylqy qaıyrǵandaı qıqýlasyn kep. Sol jaq dep buıyrdy asaba. Sol jaq qatarda ıin tiresip otyrǵan, ishken mas, jegen toq meımandar meıramhananyń qabyrǵasyn qaqyrata aıǵaılasyn kelip.
Osy asabalar halyqty, ásirese jastardy tárbıeleýge tıisti emes pe edi. Ulttyq uǵymnyń uńǵysyna enbeıtin jat kórinisterdi boıyna qaıdan sińirip alǵan? Toıǵa baramyn dep qajyp qaıttyq. Sóıtsek, bul sońǵy kezde etek alǵan, kóptiń kózi úırengen kórinis eken. Aıtpaqshy, siz toıǵa baryp júrsiz be?