Azamattyq paryzǵa adaldyq tanytaıyq
Elimizdiń shyǵarmashyl jáne eńbek ujymdary barsha qazaqstandyqtardy prezıdenttik saılaýǵa qatysýǵa shaqyrady
Ortalyq kommýnıkasııalar qyzmetiniń Almaty bólimshesinde jalpyrespýblıkalyq «Seniń daýysyń – seniń bolashaǵyń» atty posterler baıqaýynyń bastalǵany jóninde brıfıng ótti. Oǵan elimizdiń abyroıyn asyrǵan sportshylar, mádenıet, óner salasynyń jas ókilderi, belsendi blogerler men qoǵamdyq uıymdardyń músheleri qatysty. Baıqaýdyń negizgi maqsaty elimizdegi saıası mańyzdy oqıǵa – 2015 jyly 26 sáýirde ótetin kezekten tys prezıdenttik saılaýǵa qatysýshylardyń belsendiligin arttyrý, azamattyq qoǵamnyń biregeı quqyqtyq sanasyn qalyptastyrý boldy. Atalǵan sharany jas jýrnalısterdiń «Qalamger azamat» qoǵamdyq qory uıymdastyrdy. Qurylǵanyna alty jyl bolǵan qordyń jetekshisi A.Qyryqbaı búginde ınternet, feısbýk, ıstagram, poster jastardyń uǵynyqty tili ekenin, sondyqtan olardy, jalpy qazaqstandyqtardy saılaýǵa kóptep qatystyrý úshin osy jobany qolǵa alǵandaryn jetkizdi. – Baıqaýǵa Qazaqstannyń túkpir-túkpirinen qatysýǵa nıet bildirgender ótinim men daıyndaǵan materıalyn onlaın júıesi arqyly joldaı alady. Jarııa etilgen posterdi ınternet qoldanýshylar da onlaın júıesinde baǵalap, daýys beretin bolady. Bul bir jaǵynan jastardy shyǵarmashylyq jumysqa tartyp, olardyń eńbegin tanytý. Al jeńimpazdar eńbekteri kóshedegi bannerlerde, qoǵamdyq uıymdar men qoǵamdyq jerlerde ilinedi. Sondyqtan qazaqstandyq jastardy osy baıqaýǵa qatysýǵa shaqyramyz, – dedi Aıdar Qyryqbaı. Qazylar alqasynyń tóraǵasy Qazaqstan Sýretshiler odaǵynyń tóraǵasy, Qazaqstannyń eńbek sińirgen qaıratkeri, professor Baıtursyn О́mirbekov qazaqstandyq sýretshilerdi jastardyń mundaı bastama kóterýi qýantyp otyrǵanyn, óıtkeni, bul baıqaýda ár adam elimizdiń prezıdenttik saılaýdy ótkizýde óziniń shyǵarmashylyq ıdeıasyn, múmkindigin synap kóretinin, eń bastysy, oǵan tek kásibı sýretshiler ǵana emes, barsha ónerge beıimi bar azamattardyń qatysýy arqasynda toptasyp, elimizdegi aıtýly oqıǵada óz belsendilikterin kórsetetinin jetkizdi. – Búgin búkil qazaqstandyqtarda, el-eldi, jer-jerdi qamtıtyn úlken báıge bastaldy, – dedi baıqaýdyń qazylar múshesi, belgili ánshi Nurlan Alban. – Baıqaýda jas mólsherine eshqandaı shek qoıylmaǵan. Sondyqtan bizdiń árbir otandasymyz ben árbir qazaqstandyqtyń osy sharaǵa qatysýyna múmkindik bar. Bul aksııa ne úshin kerek? Barlyǵymyz bir adamdaı osy aıtýly jáne jaýapty kúnge, ıaǵnı kámeletke tolǵan jas býynnan bastap ózin Qazaqstan Respýblıkasynyń tolyqqandy azamaty sanaıtyndar saılaýǵa atsalysýymyz kerek. Ol – memlekettiń tynyshtyǵy, ol – eldiń tynyshtyǵy. Ol – el-jurttyń amandyǵy, bereke-birligi. Osy múmkindikti paıdalana otyryp, óner sapynda júrgen áriptesterimdi, barsha halyqty saılaýǵa tastúıin qatysýǵa shaqyramyn. Jeńimpazdardy bas júlde men úsh júldeli oryn, baǵaly syılyqtar, uıymdastyrýshylar atynan alǵys hat pen arnaıy sertıfıkattar kútip tur. Týyndylar 17 naýryzdan 19 sáýirge deıin qabyldanady. Tek bir eskeretin jaıt, belgili bir úmitkerge daýys berýge úgit-nasıhattyq sıpattaǵy jumystar qabyldanbaıdy. Baıqaýǵa usynylatyn jumystar 5 megabaıttan aspaıtyn JPEG, PNG, BMP pishimderindegi sailau2015.el.kz arnaıy paraǵyna júktelýi tıis. Sondaı-aq, brıfıng aıasynda Shyǵys Qazaqstan, Ońtústik Qazaqstan, Mańǵystaý, Qaraǵandy, Atyraý oblystary jastarymen telekópir uıymdastyryldy. Onda oblystaǵy jastar atalǵan baıqaýǵa belsene qatysatyndyqtaryn bildirdi. Gúlzeınep SÁDIRQYZY, «Egemen Qazaqstan». ALMATY. Sýretti túsirgen Iýrıı BEKKER.