Aqtóbe oblysy, Oıyl aýdanynyń ońtústik-shyǵys baǵytyndaǵy Qumsaı qorymynda arheologııalyq qazba jumystary bıylǵy jazda qaıta jandandy. Osydan bes myń jyldaı buryn paıda bolǵan qorǵandar úıindisi erte qola dáýirindegi «kóne shuńqyr» mádenıetine sáıkes keledi ári bul jerdegi obalardan Soltústik Kavkaz ben Mesopotamııa oıpaty órkenıetine uqsas jerleý ǵurpy anyqtaldy, dep habarlaıdy Egemen.kz.
Qumsaı qorymynda 168 oba bar. Keı obalarda eresekter men balalar birge jerlengen. Qazba jumystary kezinde sıyr malynyń súıegi, tas jebeniń ushy, qumyra synyǵy, baqa súıeginen jasalǵan tostaǵan tabyldy. Jerleý ǵurpy dala órkenıetine uqsamaıtyn obalar sheteldik ǵalymdardyń da qyzyǵýshylyǵyn týǵyzyp otyr. Ejelgi adamdardyń baılanysyn zertteýge Mıchıgan ýnıversıtetiniń professory Alısha Ventreske Mıller de kirisip, Á. Marǵulan atyndaǵy arheologııa ınstıtýtynyń jetekshi ǵylymı qyzmetkeri Arman Beısembaevpen birge qorymnan tabylǵan múrdelerge genetıkalyq zertteýdi bastady. Halyqaralyq ekspedısııa quramyna máskeýlik arheolog ǵalym Alekseı Havanskıı de qosyldy.
Qazirgi kezde Qumsaıda júrgizilip jatqan qazba jumystaryna Aqtóbe jáne Qaraǵandy ýnıversıtetteriniń tarıh fakýlteti stýdentteri de qosyldy. О́ndiristik tájirıbeden ótip jatqan stýdentterdiń jaǵdaıyn kórýge Oıyl aýdanynyń ákimi Asqar Qazybaev, Qudaıbergen Jubanov atyndaǵy Aqtóbe óńirlik ýnıversıtetiniń rektory Laýra Qarabasova keldi.
Aqtóbe oblysy