Senat depýtattarynyń óńirlerge sapary jalǵasyn tapty. Keshe olar jergilikti saılaýshylarmen kezdesip, aımaqty alańdatqan ahýalmen tanysty. Sondaı-aq mańyzy joǵary is-sharaǵa qatysyp, sóz sóıledi.
«Rýhanı dıplomatııa men álemdik jáne dástúrli dinderdiń qasıetti murasyn saqtaý» atty halyqaralyq konferensııada Senat depýtaty Darhan Qydyráli túrli senimder arasyndaǵy dıplomatııanyń róline toqtaldy. Dinı konfessııalar, ǵylymı qaýymdastyq, dıplomatııalyq toptar jáne azamattyq sektordyń ókilderi dinaralyq dıalog salasyndaǵy syn-qaterdi, sondaı-aq jahandyq beıbitshilik pen ózara túsinistikti nyǵaıtýdaǵy kelisim men senimniń mańyzyn talqylady. Konferensııada sóz sóılegen D.Qydyráli Astanada ótetin Álemdik jáne dástúrli dinder kóshbasshylarynyń VIII sezi qarsańyndaǵy kezdesýdiń erekshe máni bar ekenin atap ótti.
«Prezıdent dinaralyq dıalogke, kelisim men ózara túsinistikke erekshe mán beredi. Bul baǵytta Álemdik jáne dástúrli dinder kóshbasshylary seziniń Hatshylyǵy men Parlament Senaty tarapynan aýqymdy jumys atqarylyp jatyr. Musylman aqsaqaldar keńesiniń qyzmeti de elimizdiń rýhanı dıplomatııa salasyndaǵy baǵyt-baǵdarymen úndes. О́zgermeli álemde rýhanı baǵdarlar men qasıetti muralardy saqtaý mańyzdy», dedi D.Qydyráli.
2 shildede senatorlar Nurtóre Júsip pen Altynbek Nuhuly ál-Farabı atyndaǵy QazUÝ oqytýshylarymen kezdesti. N.Júsip joǵary oqý ornynyń basshylyǵymen áńgime barysynda ál-Farabı atyndaǵy Qazaq ulttyq ýnıversıteti qazirgi zamanǵy otandyq joǵary bilim men ǵylym júıesin qalyptastyrýda sheshýshi ról atqaratyn Ortalyq Azııadaǵy eń kóne jáne jetekshi joǵary oqý oryndarynyń biri ekenin atap ótti.
«Búginde jahandyq syn-qaterler men qarqyndy ózgerip jatqan álem jaǵdaıynda ál-Farabı atyndaǵy Qazaq ulttyq ýnıversıtetiniń mańyzy arta tústi. Bul – jaı ǵana bilim berý mekemesi emes, bilim údetýdegi ulttyń strategııalyq resýrsy, jańa býyn kóshbasshylaryn tárbıeleý jáne halyqaralyq arenada elimizdiń kelbetin ilgeriletý ortalyǵy. Ýnıversıtetti qoldaý jáne damytý, onyń derbestigin nyǵaıtý, halyqaralyq áriptestikti keńeıtý, elimizdiń túkpir-túkpirinen jáne shetelden talantty jastardyń aǵynyn qamtamasyz etý – memlekettiń asa mańyzdy mindeti», dedi N.Júsip.
Depýtat A.Nuhuly óz kezeginde QazUÝ úsh deńgeıli bilim júıesin engizýdegi bastamashynyń biri ekenin atap ótti.
«QazUÝ tek oqytyp qoımaı, ult elıtasyn qalyptastyrady. Parlament depýtattarynyń 25%-dan astamy, ondaǵan ákimder, mınıstrler, ǵalymdar, dıplomattar men qoǵam qaıratkerleri – ál-Farabı atyndaǵy ýnıversıtettiń túlekteri», dedi A.Nuhuly.
Keshe Senat depýtattary Bıbigúl Jeksenbaı, Marat Qojaev jáne Gennadıı Shıpovskıh elordadaǵy Ulttyq balalardy ońaltý ortalyǵy men qalalyq psıhıkalyq densaýlyq ortalyǵynda boldy. Kezdesý barysynda Memleket basshysynyń elimizde júrgizilip jatqan áleýmettik reformalarǵa qatysty tapsyrmalary týraly jan-jaqty aıtyp berdi jáne parlamenttiń aǵymdaǵy zań shyǵarý qyzmeti men bastamalary boıynsha qabyldanǵan zańdardyń erejelerin túsindirdi.
Al senatorlar Olga Býlavkına men Shákárim Buqtuǵutov Shyǵys Qazaqstan oblysynyń Samar jáne Kúrshim aýdandarynda áleýmettik jáne ınfraqurylymdyq jobalardy júzege asyrý barysymen tanysty.
«Basym mindettiń biri – aýyl balalaryna sapaly bilim berý. Aýyldy sózben emes, naqty jobalar arqyly damytý kerek. Eger biz aýyl jastaryn saqtap qalǵymyz kelse, onda mektep, sportzal, jol jáne medısına qaladaǵydan kem bolmaýy kerek», dedi O.Býlavkına.
Sapar barysynda aýdan jáne oblys ákimderimen, máslıhat depýtattarymen jáne kásipkerlermen kezdesýler ótti. Sý qubyrlary men dene shynyqtyrý nysandaryn salý, sanıtarlyq qaýipsizdikti saqtaý máseleleri men týrızmdi damytý múmkindikteri talqylandy. Sondaı-aq dárigerlerdiń jetispeýshiligi, tegin dári-dármektermen qamtamasyz etýdiń keshigýi, áleýmettik sala nysandarynyń jaı-kúıi, jastar saıasaty men jas mamandarǵa turǵyn úı berý sekildi júıeli máseleler de qozǵaldy. Senatorlar sapar qorytyndysy boıynsha kóterilgen árbir másele Senat talqysyna shyǵarylyp, óńirdi kóterýge baǵyttalǵan zańnamany jetildirý jónindegi jumysty jalǵastyrýǵa ýáde berdi.