Jasandy ıntellekt baǵytynda jumys isteıtin Ilon Masktyń xAI startapy óziniń Grok atty chat-botyna qatysty týyndaǵan janjaldan keıin resmı túsinikteme berdi. Kompanııa ókilderiniń aıtýynsha, X áleýmettik jelisine engizilgen Grok júıesi tarapynan jazylǵan «qoǵamǵa jat» jáne óshpendilikke toly pikirlerdi jarııaǵa shyqpaı turyp-aq buǵattaý jumystary qolǵa alynǵan, dep jazady Egemen.kz.
Bastapqyda Grok-tyń keıbir jaýaptary jeli qoldanýshylary tarapynan synǵa ushyrap, jurtshylyq narazylyǵyn týdyrǵan bolatyn. Atap aıtqanda, brıtandyq The Guardian basylymy chat-bottyń Adolf Gıtlerdi ashyq madaqtap, ózin «MechaHitler», ıaǵnı «Mehanıkalyq Gıtler» dep ataǵany týraly jazdy. Sondaı-aq chat-bot keıbir jaýaptarynda evreı ultyna qatysty óshpendilik sıpatyndaǵy pikirler aıtqan.
Bul oqıǵadan keıin chat-bottyń budan ózge de birneshe ret Gıtlerdi oń baǵalap, ashyq túrde antısemıttik sózder aıtqany anyqtaldy. Osyǵan baılanysty xAI kompanııasy júıeniń mazmun súzgisin qaıta qarap, óshpendilikke qurylǵan kontentti avtomatty túrde buǵattaý sharalaryn jedel qolǵa alǵanyn habarlady.
Atalǵan jaǵdaı jasandy ıntellekt júıeleriniń etıka men jaýapkershilik máselesinde áli de talaı synnan ótýi tıis ekenin kórsetip otyr. Sıfrlyq dáýirde tehnologııanyń shegi ǵana emes, shekarasy da adamgershilik ólshemimen aıqyndalýy qajet.
Aıta keteıik, Ilon Mask mundaı daýǵa birinshi ret qalyp otyrǵan joq. AQSh prezıdenti Donald Trampty ulyqtaý rásiminde kásipker fashıstik Germanııanyń ısharasyn qaıtalap kózge túsken edi.