Oblys ákimdigi mádenıet jáne tilderdi damytý basqarmasyna qarasty halyq shyǵarmashylyǵy ortalyǵynyń uıytqy bolýymen «Áýlıeata áýenderi» jobasynyń úzdikteri sahna tórine kóterilip, gala-konsert qoıdy. «Erlik» memorıaldyq keshenindegi «Jeńis» saıabaǵynda ótken dýmandy keshke tarazdyq ónersúıer qaýym kóp jınaldy.
Ádebı-mádenı kesh barysynda sóz alǵan óńir basshysynyń orynbasary Serik Sálemov joba aıasynda ter tókken shyǵarmashyl jastardy quttyqtap, olardyń kásibı mansabyna, shyǵarmashylyq jolyna tabys tiledi. Ol jergilikti atqarýshy bılik talantty jastardy qoldap, ilkimdi jobalar arqyly jastardyń kásibı turǵydan damýyna mol múmkindik qarastyrylatynyn atap ótti. «Dástúrli án», «Aspapta oryndaý», «Vokal» atalymdary boıynsha úzdik shyqqan qatysýshylarǵa arnaıy dıplom men kádesyı tabystady.
Uıymdastyrýshy taraptyń aıtýynsha, joba jeńimpazdary oryndaǵan ánder men kúıler arnaıy mýzykalyq jınaqqa toptastyrylǵan. Sáýir aıynda bastalǵan óńirlik jobanyń irikteý kezeńi mamyr aıynda ótkizilgen. «Áýlıeata áýenderi» jobasyna óńirdiń barlyq aýdandary men Taraz qalasynan 271 úmitker túrli atalym boıynsha baq synapty. Olardyń ishinen suryptalyp alynǵan 63 qatysýshy oblystyq kezeńge joldama alǵan. Sol 63 saıypqyrannyń arasynan úzdik dep tanylǵan 20 qatysýshy gala-konsertke qatysyp, ónerin ortaǵa saldy.
Jergilikti atqarýshy bılik ókilderiniń aıtýynsha, jas talanttardyń ónerin tanytý maqsatynda qolǵa alynǵan mundaı ilkimdi jobalar aldaǵy ýaqytta da jalǵasady. Soǵan qaraǵanda ónerge ańsary aýǵan shyǵarmashyl jastardyń kásibı turǵydan damýyna áli de múmkindik bolatyn sekildi.
Taraz