Búgin Májilis depýtaty Danabek Isabek jumys saparymen Shymkent qalasyndaǵy «Izetti zeınetker» mekemesinde bolyp, ortalyq jumysymen tanysty. Atalǵan mekeme «AMANAT» partııasynyń saılaýaldy baǵdarlamasy aıasynda qurylǵan, dep habarlaıdy Egemen.kz.
2023 jyly 1 qarashada jumysyn bastaǵan atalǵan ortalyq – zeınetkerlerge qysqa merzimdegi demalý men em alý múmkindigin usynatyn arnaıy mekeme. Alǵashynda 70 orynǵa eseptelgenimen, búginde bir mezette joldamamen kelgen 120 zeınetkerdi qabyldaı alady.
Depýtat Danabek Isabek mekemeniń jumysymen jan-jaqty tanysyp, qarııalardyń hal-jaǵdaıyn surady.
«Munda qarııalar úshin barlyq jaǵdaı jasalǵan. Medısınalyq kómek, mádenı-tanymdyq is-sharalar, kúndelikti turmysqa qajetti qoldaý bári oılastyrylǵan. Mundaı ortalyqtar qarttarymyzdyń ózderin qoǵamnyń tolyqqandy múshesi retinde sezinýine múmkindik beredi. Sondyqtan mundaı tájirıbeni elimizdiń basqa óńirlerine de keńinen taratý qajet. Qarııaǵa qurmet – urpaqqa ónege. Bul baǵyttaǵy jumystar árdaıym memleket nazarynda bolýy tıis», dedi depýtat D.Isabek.
Mekeme basshylyǵynyń aıtýynsha, demalýshylarǵa kúnine 4 mezgil ystyq taǵam usynylady. Mekeme ǵımaratynyń jalpy aýmaǵy – 3 699,9 sharshy metr. Taza aýada serýendeýge arnalǵan aýla, kógaldandyrylǵan alańdar, oryndyqtar, sý burqaq jáne shaǵyn saıabaq qarastyrylǵan. Bul qarııalardyń tynyǵýy men psıhologııalyq demalysy úshin qolaıly jaǵdaı jasaýǵa baǵyttalǵan.
Mekemede demalýshylar medısınalyq jáne áleýmettik qyzmetpen tolyq qamtylǵan. Dáriger qabyldaýynan ótip, densaýlyǵyna qaraı arnaıy emdik sharalardan ótken ár zeınetker ortalyqtyń qyzmetine rızashylyqtaryn bildirip, alǵystaryn aıtyp, batalaryn berip júr.
Aıta ketelik, «Izetti zeınetker» ortalyǵyna joldama alý prosesi tolyq sıfrlandyrylǵan. Zeınetkerler geo-shym.kz portaly arqyly elektrondy sıfrlyq qoltańbamen tirkelip, onlaın ótinim bere alady. О́tinish bergennen keıin kezek retin de elektrondy júıe arqyly baqylaýǵa múmkindik bar.