Kesheden, ıaǵnı 3 shildeden doktorantýraǵa túsý emtıhanyna qatysýǵa ótinish qabyldaý bastaldy. Bul aldaǵy 3 tamyzǵa deıin jalǵasady. Emtıhan 4–20 tamyz aralyǵynda ótedi.
Túsý emtıhanyna qatysýǵa tirkelý Ulttyq testileý ortalyǵynyń http://app.testcenter.kz/ saıtynda júrgiziledi. Doktorantýraǵa túsý úshin bir joǵary oqý orny men bilim baǵdarlamalarynyń bir tobyn ǵana tańdaýǵa bolatynyn eskergen jón.
Eger talapker berilgen ótinishke (testileýdi tapsyrý qalasy, bilim baǵdarlamalarynyń toby, testileýdi tapsyrý tili) ózgerister engizý qajet bolǵan jaǵdaıda, oǵan ótinishterdi qabyldaý júıesi jabylǵanǵa deıin (3 tamyzǵa deıin) ótinishti óńdeý nemese joıý múmkindigi beriledi. Testileýdi ótkizý orny men ýaqyty týraly aqparat úmitkerdiń jeke kabınetinde 9 tamyzda qoljetimdi bolady.
Túsý emtıhanyna áńgimelesý, esse jazý jáne bilim baǵdarlamasy tobynyń beıini boıynsha emtıhan kiredi. Jalpy túsý emtıhanynyń eń joǵary kórsetkishi – 100 ball, onyń ishinde áńgimelesý – 30 ball, esse – 20 ball, beıini boıynsha emtıhan suraqtary 50 baldy quraıdy. Al memlekettik bilim tapsyrysy boıynsha konkýrsqa qatysý úshin jáne aqyly negizde doktorantýraǵa túsý úshin shekti ball 75-ti quraıdy.
Doktorantýraǵa túsý úshin QAZTEST júıesi boıynsha memlekettik tildi jáne shet tilin meńgergenin rastaıtyn sertıfıkat usyný qajet. TOEFL ITP sertıfıkaty bar tulǵalar doktorantýraǵa túsý emtıhany bastalǵanǵa deıin aǵylshyn tilin bilýge arnalǵan qosymsha testileýdi tapsyrady.
Atap ótsek, 2024 jyly shet tilin meńgergenin rastaıtyn sertıfıkattardyń shekti deńgeıleri B1-ge deıin tómendetildi jáne tizimge TOEIC jáne Duolingo English Test sertıfıkattary engizildi.
2024 jyldan bastap úmitkerlerdiń beıinimen doktorlar baǵdarlamasy boıynsha doktorantýraǵa túsýge múmkindikteri bar. Bul baǵdarlama úshin shet tilin meńgergenin rastaıtyn sertıfıkattyń belgili bir deńgeıi talap etilmeıdi. Sondaı-aq doktorlar baǵdarlamasy boıynsha talapkerler emtıhan barysynda esse jazbaıdy.
Eń joǵary kórsetkish – 80 ball, onyń ishinde áńgimelesýge – 25 ball, kásiporyndar men uıymdardyń usynys hatyna (bolǵan jaǵdaıda) – 5 ball jáne beıini boıynsha emtıhan suraqtary 50 baldy quraıdy. Shekti ball – keminde 50 ball.