Keshe Almatydaǵy Ulttyq baspasóz klýbynda belgili jazýshy Adolf Arsıshevskııdiń «Bıgeldy Gabdýllın: pravo na ıspoved» («Bıgeldi Ǵabdýllın: aǵynan jarylý quqy») atty jańa kitabynyń jaryq kórýine oraılastyrylǵan baspasóz máslıhaty bolyp ótti. Oǵan avtormen birge Qazaqstannyń eńbek sińirgen mádenıet qaıratkeri, kórnekti jazýshy Smaǵul Elýbaı, prozashy Úmit Tájikenova jáne basqalar qatysyp, tyń týyndyǵa baılanysty óz oı-paıymdaryn ortaǵa saldy.
Bizde jýrnalıster jaıynda jazylǵan kitap kóp emes. Bálkim, myna jınaq sol qatardaǵy tyrnaqaldy bolar. Onyń ústine ol derekti roman-esse deıtin sırek janrda órnektelgen. Munda bizdiń mamandyqtyń nebir qııapat qıyndyqtary, qaptaldasa qatar júretin qaýip-qaterleri, kóńil-kúıindegi kúızelister jaıly da búkpesiz aıtylǵan. Sondaı-aq shyǵarmashylyq eńbektiń bizge syılaıtyn qýanysh-shattyǵy da nazardan tys qalmaǵan.
Kitaptyń bas keıipkeri jýrnalıstik hám jazýshylyq ortalarda kádimgideı-aq máshhúr adam. Bıgeldi Ǵabdýllınniń bir basyna jeterlik qaıshylyqtary da bar, jurttyń bárine birdeı jaǵa da bermeıdi, ońaı-ospaq ta tulǵa emes. Biraq ol, tipti, óziniń adasýlarynda da barynsha adal, barynsha shynaıy. Soǵan qaramastan, bul tulǵa jańa zamandaǵy Qazaqstan medıakeńistigi sáýletkerleriniń birinen sanalady. Búgin tańda jurt ony qarymdy qalamger, jańashyl jýrnalıst retinde tanıdy. Bertingi ýaqytta «Novoe pokolenıe» jáne «HHI vek» respýblıkalyq gazetteriniń bas redaktory ári qurýshysy bolǵan. Jaqynda biz Qazaqstannyń asa tanymal gazetteriniń biri, Bıgeldi Ǵabdýllın quryp, basqaryp kele jatqan Central Asia Monitor-dyń 10 jyldyǵyn atap ótkenbiz. Qazaq ádebıetiniń klassıgi Ábdijámil Nurpeıisov Qazaq PEN-klýbynyń tizginin ózinen keıin naq osy Bıgeldi Ǵabdýllınge ustatýy da beker emes. Onyń basshylyǵymen osynaý jazýshylar birlestigi jańasha tynystap, jańasha órken jaıýda. Ol sonymen birge «Velıkoe kocheve» («Uly kósh») atty tamasha tanymdyq jınaqtyń avtory. Onyń ómirbaıany shıelenisken ózgeshe qatparlarymen qaıran qaldyryp, bizge adamı bolmystyń qaıtalanbas tartymdylyǵyn ǵıbrat etedi. Onyń ústine ómir adamǵa bir-aq ret berilgen. Bizdiń árqaısymyz taǵdyr talqysyna qaramastan, ol ómirdi árqashan aq paraqtan bastap jazýǵa májbúrmiz. Adolf Arsıshevskııdiń «Bıgeldi Ǵabdýllın: aǵynan jarylý quqy» derekti roman-essesiniń betterinen osyndaı rýhanı bolmys-bitimi ábden qalyptasqan erekshe adamnyń ómiri aǵynan jarylyp syr ashady.
Qorǵanbek AMANJOL, «Egemen Qazaqstan».
ALMATY.