«Barys» hokkeı klýby negizgi quramnyń jattyqtyrýshylar shtabyna ózgeris engizetinin málimdedi. Bul sheshim ótken maýsymdaǵy qanaǵattanarlyqsyz sporttyq nátıjelerge baılanysty qabyldanǵan, dep habarlaıdy Egemen.kz.
«Qazirgi ýaqytta «Barystyń» bas bapkeriniń mindetin ýaqytsha Evgenıı Korolev atqarady. Barlyq reglamenttik rásimder aıaqtalǵannan keıin, jattyqtyrýshylyq quramdaǵy ózgerister boıynsha tolyq aqparat beriledi», delingen resmı málimdemede.
Aıta keteıik, Sports.kz portalynyń habarlaýynsha, Ǵalym Mámbetalıevtiń basshylyǵymen óner kórsetken «Barys» komandasy Qurlyqtyq hokkeı lıgasynyń (QHL) ótken maýsymyndaǵy regýlıarlyq chempıonatta Shyǵys konferensııasynda 12-oryn (sońǵy oryn) ıelengen. Komanda 68 matchtyń 54-inde jeńilip, bar bolǵany 35 upaı jınaǵan.