Úkimette Premer-mınıstrdiń birinshi orynbasary Roman Sklıardyń tóraǵalyǵymen Investısııalar tartý jónindegi keńestiń otyrysy ótti. Onyń barysynda sondaı-aq agroónerkásiptik keshendegi ınvestısııalyq jobalardy júzege asyrý máseleleri de qaraldy.
Máselen, agroónerkásiptik sektordaǵy eki joba boıynsha ınvestısııalar týraly kelisimderdiń negizgi sharttary maquldandy. Birinshi jobada «Tiryaki Agro» túrik kompanııasynyń qatysýymen astyqty tereń óńdeý kesheniniń qurylysy qarastyrylǵan. Onyń josparlanǵan óndiristik qýaty jylyna 250 myń tonna óńdelgen bıdaı men 80 myń tonna burshaqty quraıdy. Investısııalardyń jalpy kólemi – shamamen 160 mlrd teńge.
Jıynda ekinshi jobanyń da sharttary bekitildi, ol – kelesi bir túrik kompanııasy «YDA Group»-tyń qatysýymen tyńaıtqyshtar men pestısıdter óndiretin agrohımııalyq keshen salý. О́ndiris qýaty – jylyna 150 myń tonna, ınvestısııa kólemi – 168 mlrd teńge.
Eki joba da aýyl sharýashylyǵy shıkizatyn tereń óńdeýdi damytýǵa, azyq-túlik qaýipsizdigi deńgeıin arttyrýǵa, ımportty almastyrýǵa jáne qosylǵan quny joǵary ónim assortımentin keńeıtýge baǵyttalǵan.
Qazaqstanda astyq daıyndaýdyń jyl saıynǵy kólemi 16-17 mln tonna deńgeıinde ekenin jáne úshten bir bóligi eksportqa ketetinin eskere otyryp qolǵa alynǵan ónimniń 260 túrin qamtıtyn ishki óńdeýdi damytý bastamasy ekonomıkany ártaraptandyrý jáne agroónerkásiptik keshenniń ornyqty damýy úshin qosymsha múmkindikter ashady.
Sonymen qatar ınvestısııalyq shtab qolaıly ınvestısııalyq ahýaldy qalyptastyrý boıynsha júıeli jumystardy da jalǵastyrýda. Basty nazar normatıvtik bazany jetildirýge, ákimshilik kedergilerdi azaıtýǵa jáne ekonomıkanyń basym salalarynda ınvestısııalyq bastamalardy iske asyrý úshin turaqty jaǵdaılar qalyptastyrýǵa salynǵan.