Bakýde Qazaq kınosynyń bir aılyq maýsymy bastaldy. Saltanatty is-shara «Dos-Muqasan» mýzykalyq dramasymen ashyldy. Rejısser Aıdyn Sahamannyń fılmi eldiń mýzyka ónerine jańa serpin bergen, qazaq rokynyń negizin qalaýshy tanymal qazaqstandyq ansamblge arnalady, dep jazady Egemen.kz.
Is-shara aıasynda ázerbaıjandyq talantty ánshiler men mýzykanttardyń qatysýymen konserttik baǵdarlama uıymdastyrylyp, bul kesh qos halyq arasyndaǵy mádenı baılanystyń aıqyn kórinisine aınaldy.
Keshke Ázerbaıjan Respýblıkasyndaǵy Tótenshe jáne О́kiletti Elshisi Álim Baıel, shyǵarmashylyq jáne ǵylymı zııaly qaýym ókilderi, dıplomatııalyq korpýs músheleri, BAQ, Bakýde turatyn qazaqstandyqtar men qazaq kınosyn qoldaýshylar qatysty.
«Dos-Muqasan» fılmi Efrat Sháripovtiń ssenarııi negizinde Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Týyndynyń prodıýseri – Aıgúl Baıbek.
Fılm jelisi polıtehnıkalyq ınstıtýttyń stýdentteri qurǵan ansambl tarıhyn baıandaıdy. Jas mýzykanttardyń óner men ǵylym arasyndaǵy kúrdeli tańdaýy, konsertterge tyıym salý, partııa tarapynan qysym, oqý ornyndaǵy qıyndyqtar sekildi shynaıy ómirlik kedergiler kórinis tabady.
Kınotýyndyda keıipkerlerdiń tarıhı beınesin dál berý úshin akterler naqty prototıpterge saı tańdalǵan. Týyndynyń tarıhı shyndyqqa saı bolý úshin ansambl músheleri Murat Qusaıynov pen Dosym Súleımenov arnaıy keńesshi retinde shaqyrylǵan.
Baký qalasynda ótip jatqan Qazaqstan kınosy aılyǵy aıasynda elimizdiń zamanaýı kınoóneriniń san qyryn tanytatyn basqa da týyndylardyń kórsetilimi josparlanǵan.