2029 jylǵa deıin qatty qaldyqtardy qaıta óńdeý jáne basqarýdy 40%-ǵa jetkizý maqsatynda Ekologııa jáne tabıǵı resýrstar mınıstrligi 345 mlrd teńgeni quraıtyn 67 jobany júzege asyrýǵa ázirlep jatyr, dep jazady Egemen.kz.
Bul týraly Úkimette ótken baspasóz konferensııasynda Ekologııa jáne tabıǵı resýrstar mınıstri Erlan Nysanbaev aıtty.
«Búgingi tańda 52 mlrd teńgege 14 joba qarjylandyryldy. Jalpy 67 jobanyń 41-i tek qana óńdeý salasyna arnalǵan. Olar negizinen qaǵaz, plastık, áınek jáne taǵy basqalar. Qaldyqtardyń ishinde eń kóp shyǵatyny osy úsheýiniń qaldyqtary. Sol sebepten jyldyń aıaǵyna deıin biz jańaǵy aıtqan 67 jobany tolyǵymen bastap ketýdi josparlap otyrmyz. Sonyń nátıjesinde búgingi 25,8% ǵana óńdeıtin kórsetkishimizdi 2029 jylǵa qaraı 40%-ǵa jetkizetinimizge senimimiz mol», dedi Erlan Nysanbaev.