Uzyndyǵy 1 668 km Orynbor – Tashkent magıstraliniń qurylysy bastalǵan 1904 jyl – Qazaqstanda temirjol kóliginiń qurylǵan jyly bolyp sanalady. Temirjol boıynda Aqtóbe, Oral, Túrkistan, Qyzylorda jáne basqa da qalalar men ónerkásip ortalyqtary ósti, dep habarlaıdy Egemen.kz.
Qazaqstan aýmaǵynda alǵashqy temirjol magıstraliniń ashylýy 1894 jyly 25 qazanda – Pokrovskaıa sloboda (qazirgi RF Saratov oblysynyń Engels qalasy) – Oral tar tabandy jelisiniń qurylysy aıaqtalǵannan keıin bolǵan. Osy temirjoldyń 130 shaqyrymy qazirgi Qazaqstan aýmaǵy arqyly ótti. 4 jyldan keıin Ýrbah – Astrahan tar tabany iske qosyldy, onyń 77 shaqyrymy da Qazaqstan jerinen ótken eken.
Soltústik Qazaqstannyń damýy úshin 1891-1896 jyldary Transsibir magıstralin salý, atap aıtqanda onyń 190 shaqyrymdyq otandyq ýchaskesin qurý úlken mańyzǵa ıe boldy, bul jol – halyqtardyń ekonomıkalyq jáne mádenı jaqyndasýynda úlken ról atqardy. 1914-1917 jyldary Arys – Pishpek Jetisý joly – bolashaq Túrksibtiń bir bóligi, 1915 jyly – Chelıabınsk – Troısk – Qostanaı magıstrali (Qazaqstan boıynsha 166 km) salyndy.