Batys pen shyǵys, kósheli men otyryqshy mádenıetteriniń túıisken tusy tórt qaqpaly kıeli Túrkistan shahary dúbirli toıǵa kerýen ákelip, keremet jármeńke uıymdastyrdy, dep jazady Egemen.kz.
2 tamyz, Hakim Abaıdyń 180 jyldyq mereıtoıy arnalǵan onkúndik is-sharalardyń ekinshi kúngi qyzyǵyn kórgisi kelgen aǵaıy, tań atysymen Semeı qalasyndaǵy «Arena» mádenı-sporttyq keshenine aǵyldy. Biz de osy qara nópirdiń ishinde kelemiz. Osylaısha «Arena» aýmaǵynda Túrkistan oblysynyń mádenı kúnderi bastaldy. Eki kúnge sozylatyn bul is-shara qos oblys arasyndaǵy yntymaqtastyq negizinde ońtústik óńirden toıǵa tartý retinde uıymdastyrylyp otyrǵanyn aıta ketken jón.
Mádenı kúnder aıasynda aýyl sharýashylyǵy ónimderiniń jármeńkesi ashyldy. Túrkistan óńiriniń tabıǵı ári sapaly ónimderi naryqtaǵydan edáýir tómen baǵamen saýdalandy. Jármeńkege Túrkistan oblysynan 540 tonnadan asatyn, 40-qa jýyq ónim túrleri jetkizilipti. Onyń ishinde 194 tonna kartop, 81 tonna baý-baqsha ónimderi, 71 tonna jemis-jıdek, 167 tonna sút ónimderi, bal, shyryn, shujyq, jumyrtqa syndy jergilikti qaıta óńdelgen ónimder bar. Ásirese, dámi til úıiretin Myrzashóldiń qaýyny men Shardaranyń qarbyzyna suranys kóp boldy. Kún ystyqta ózimiz de bir-ekeýin jáýkemdep úlgerdik.
Qyzyq munymen bitken joq, Túrkistan oblysynyń mádenı kúnderi aıasynda qolóner sheberleriniń kórmesi de ashyldy. Onda aǵashtan, kıizden, qyshtan jasalǵan buıymdar, toqyma kilemder, zergerlik áshekeıler men túrli kádesyılar toıshyl qaýymnyń kóz jaýyn aldy. Buǵan qosa, baıaǵy jármeńkeniń saltymen kıeli Túrkistannan arnaıy kelgen «Tumar» etno-folklorlyq ansambli, «Farab» bı ansambli, «Saryn» toby men Sh.Qaldaıaqov atyndaǵy fılarmonııanyń ánshileri jármeńkege jınalǵan jurtshylyqqa konsert qoıyp, kóterińki kóńil-kúı syılady.
Túrkistan oblysynyń mádenı kúnderi aıasyndaǵy uıymdastyrylǵan is-sharaǵa oblys ákimi Berik Ýálı qatysyp, jármeńke men kórmeni aralap, ónerpazdardyń ónerin tamashalady. Abaı oblysynyń turǵyndary atynan Túrkistan oblysynyń basshylyǵyna, uıymdastyrýshylarǵa, barlyq qatysýshylarǵa alǵysyn jetkizdi.
«Túrkistan túrki dúnıesiniń rýhanı astanasy ǵoı. Semeı – alashtyń alǵashqy astanasy. Eki rýhanı óńirdiń baýyrlastyǵy, yntymaqtastyǵy qýantady. Eń bastysy, munda baǵa qoljetimdi. Jármeńkeniń úlken mereıtoıdyń kezinde uıymdastyrylǵanyn halyq jaqsy qabyldap jatyr. Bul shara Shyǵys pen ońtústiktiń arasyn jalǵaǵan altyn kópir boldy. Halyqqa qajet osyndaı jármeńkelerdi aldaǵy ýaqytta da uıymdastyrý úshin áriptesim Nuralhan Kósherovke turǵyndardyń ótinishin aıtyp, qolqa salatyn bolamyz» dedi aımaq basshysy.
Jármeńkeni uıymdastyrýshylar ónimderge halyq tarapynan suranystyń joǵary bolǵanyn aıtty.
«Abaı óńiri, Semeı halqy bizdi jyly qabyldap jatyr. Talaı jármeńkelerdi uıymdastyryp júrmiz. Biraq halyqtyń mynadaı yqylasyn birinshi ret kórip turmyz. Tańǵy saǵat 7-den bastap jınalyp, ónimderimizdi alyp jatyr», – dedi Túrkistan oblystyq aýyl sharýashylyǵy basqarmasy basshysynyń orynbasary Ermuhambet Quralbekov.
Is-shara ótip jatqan aýmaqta tórt pavılonnan turatyn fýdkort aımaǵy da jumys istep tur.
«Búgingi is-shara joǵary deńgeıde uıymdastyrylǵan, bári halyqqa yńǵaıly jasalǵan. Qalada turatyn kóp adamnyń saıajaıy joq, óz ónimin ósirmeıdi. Mundaı jármeńkeler turǵyndarǵa asa qajet. Baǵalar da bazardaǵydan áldeqaıda arzan. Turǵyndar kóp kelip jatyr, bári rıza. Osyndaı is-sharalar jıi ótip tursa degen tilegimiz bar», – dedi qala turǵyny Saǵdat Syzdyqbaeva.
Túrkistan oblysynyń mádenı kúnderi erteń de jalǵasady.
Al Semeı qalasyndaǵy Áýezov alańynda «Abaı murasy – halyq danalyǵy» atty ádebı kesh ótti. Oǵan elimizdiń túkpir-túkpirinen kelgen jáne Abaı eliniń ádebıetshileri qatysty. Abaı toıyna arnalǵan mádenı is-shara keshki altyda Abaı atyndaǵy teatr sahnasynda Qazaqstannyń halyq ártisi Maıra Ilıasovanyń «Aınaldym elim» atty shyǵarmashylyq konsertine ulasty. Konsert barysynda óner ıesi Abaı shyǵarmashylyǵyna arnalǵan ánder men qazaq mýzyka óneriniń injý-marjandaryn oryndady. Abaı oblysynyń týmasy Maıra Ilıasova bul kesh arqyly týǵan topyraǵyna degen sheksiz qurmeti men yqylasyn bildirdi. Gastroldik sapar aıasynda konsert 3-6 tamyz kúnderi Úrjar, Aıagóz, Jarma, Jańasemeı aýdandarynda da jalǵasady.
Abaı oblysy