Toı oıǵa ulasty

Abaı oblysy ákimdigi, oblystyq jastar saıasaty máseleleri jónindegi basqarmasy jáne Semeı qalasy ákimdiginiń qoldaýymen ótken aqyl-oı dodasyna elimizdiń 10 óńirinen 1 080 adam qatysty. Atap aıtqanda, Astana, Almaty, Shymkent qalalary, Shyǵys Qazaqstan, Pavlodar, Jambyl, Túrkistan, Aqmola, Atyraý, Abaı oblystarynan 180 komanda ózara baq synasty. Bul kórsetkish Qazaqstan rekordtar kitabyna (KInES) «Eń aýqymdy ıntellektýaldy saıys» retinde tirkeýge usynyldy.

«Abaı Arena» kóp­fýnk­sıonaldy mádenı-sport kesheninde ótken zııat­kerlik saıystyń ashylýyna oblys ákimi­niń orynbasary Meıirlan Rahanov qatysyp, oıynshylarǵa sáttilik tiledi.

– Aıtýly is-sharaǵa elimiz­diń túkpir-túkpirinen oıyn­shylardyń qatysýy – elimizdegi ıntel­lektýaldy oıyndar tarı­hyn­daǵy erekshe oqıǵa. «Abaı QUIZ» – tek bilim saıysy ǵana emes, jas býynnyń ulttyq tanymyn, oı-órisin keńeıtetin, ıntellektýaldy áleýetin arttyratyn biregeı jáne dástúrli alańǵa aınalatynyna senemiz, – dedi ol.

Zııatkerlik saıys 7 kezeńnen tur­dy. Ár kezeńde Abaı murasy men ár túrli salaǵa baılanysty taqy­ryp­tar qamtyldy. Oıyn barysynda qatysý­shylar oı ushqyrlyǵy men logıkalyq tapqyrlyǵyn sarapqa saldy.

– Búginde oınaı otyryp oılaı biletin orta qalyptasyp keledi. Ol – zamanaýı ári kreatıvti oılaıtyndar. Qazir elimizde qazaqsha kýız kópshilikke tanyla bastady. Mysaly, Astana, Almaty, О́skemen, Atyraý, Aqtaý, Qaraǵandy, Semeı sekildi qalalarda jaqsy damy­ǵan. Deıturǵanmen, úlken qalalarda kýızderdiń kóbi orys tilinde ótedi. Qazaq tilinde ótetin kýız sanaýly, áli de az. Osy rette, otandyq kýız tarıhynda mundaı kóp oıynshy qatysqan saıys birinshi márte bolyp otyr. Munyń Abaı toıynda uıymdastyrylýynyń da rámizdik máni bar, – deıdi kýızdiń avtory ári júrgizýshisi Mereı Ermuhanov.

Osyndaı kreatıvti ortalarda qazaq­tildi qatysýshylar kóptep tóbe kórsete bastaýyna úles qosyp júr­­gen óskemendik áriptesimiz Daryn Nur­saparovtyń aıtýynsha, «Abaı QUIZ» oıynynyń uıymdastyrylý deńgeıi joǵary.

– Talaı kýız oıyndaryn uıym­dastyrýshy-avtor ári oıynshy retinde mundaı myń adam qatysqan úlken saıysty alǵash kórýim. Uıymdastyrý deńgeıi joǵary. Oryndar da erekshe ornalastyrylǵan. Alǵash «Abaı Arena» mádenı-sport keshenine kirip kelgende, zalǵa lyq tolǵan oıynshylardy kórip qaıran qaldyq. Atmosfera erekshe boldy. Biz de shyǵystan myqty komandalarymyzdy ákeldik. 180 komanda qatysqan oı jarysynda úzdik ondyqqa «Tas Talqan» komandamyz endi. Mysaly, bizdiń Shyǵys Qazaqstan óńirinde ár kýızde 50 komanda qatysady. Alda bul rekordty jańartamyz degen oıdamyz, – deıdi ol.

Aıtýly saıysta «Brainstorm» komandasy (Astana) – I oryn (1 000 000 tg), «Almaty Mıks» komandasy (Almaty) – II oryn (800 000 tg), «Turaqsyz tirkester» (Semeı) komandasy III oryndy (600 000 tg) ıelendi. Al júldeli IV–V oryn (400 000 tg), VI–X oryndarǵa (200 000 tg) «A team», «Bort №1», «Jebe» (Pavlodar), «Quiz on AIR», «Tas Talqan» (О́skemen), «Yǵaı men Syǵaı», «Kirpi Sheshen» (Semeı) taban tiredi. Jalpy júlde qory – 4 700 000 teńge. Sonymen qatar úzdik komanda­larǵa «Úzdik stýdenttik komanda», «Úzdik ujym», «Úzdik aýdan komandasy», «Eń kreatıvti komanda», «Úzdik obraz», «Úzdik talpynys», «Qara sóz júldesi» degen arnaıy atalymdar taǵaıyndalyp, olarǵa da aqshalaı syılyq tabys etildi.

– Abaı elinde qazaqsha zııatkerlik oıyn birshama damyp keledi. Al bul jol­ǵy «Abaı QUIZ» respýblıkalyq zııat­­kerlik saıysy – Abaı toıyndaǵy erek­­she tarıhı sátterdiń biri boldy dep bile­miz. Saıysqa baqylaýshy ári qazy­lyq jasaýǵa 30-dan astam maman jáne 60 volon­ter atsalysty. Oıyndy tama­shalaýǵa 300-den astam kórermen ke­lip, jalpy 1500-ge jýyq adam qatysty. Abaı obly­sy­nyń ár aýdanynan, joǵary oqý oryndary­­nan, mektepterden, mekemelerden komandalar jıyldy. Saıysqa qatysqan bar­sha oıyn­shylarǵa, ásirese, elimizdiń túkpir-túk­pirinen kelgen qonaqtarǵa oblys aty­nan alǵys bildiremiz, – dedi uıymdas­tyrýshylar atynan Qýanysh Moldaqashev.

«Abaı QUIZ» zııatkerlik oıyny jeti negizgi kezeńnen turady, olardyń árqaısysy Abaı murasyn, ulttyq tarıh pen ádebıetti, logıkalyq oılaýdy talap etedi. Oıyn barysynda arnaıy konserttik baǵdarlamalar men mýzykalyq úzindiler kórsetildi. Sonymen birge qonaq komandalar úshin Semeı qalasynyń tarıhı-mádenı oryndaryna ekskýrsııa jasalyp, keshki as jáne mádenı baǵdarlama uıymdastyryldy.

Abaı oblysy