Tamyljyǵan tamyzdyń alǵashqy kúnderi Almaty oblysynyń ortalyǵy – Qonaev qalasynda tehnıkalyq sporttyń tyń tynysy ashyldy. Tabıǵatpen úılesim tapqan kórkem meken – Qapshaǵaı jaı ǵana demalys orny emes, Ortalyq Azııadaǵy drıft óneriniń jańa ordasy retinde tanylyp keledi.
Úsh kezeńnen turatyn «Central Asia DriftShow – 2025» (CADS) jarysynyń sheshýshi aınalymyna Qazaqstanmen birge Túrkııa, О́zbekstan, Qyrǵyzstan, Japonııa, Ońtústik Koreıa, Grýzııa, Indonezııa, Qytaı, Polsha, Reseı jáne Belarýsten kelgen kásibı drıftshiler saıysqa tústi. Qatysýshylar sanynyń artýy men geografııasynyń keńeıýi bul jobanyń kólik sportymen qatar, tutastaı bir aımaqtyń ishki týrızmin damytýǵa serpin berip otyrǵanyn ańǵartady.
«CADS-ti» — tek tehnıkalyq sheberlik pen adrenalınge toly jarys dep qaramaı, áleýmettik jelilerde keńinen talqylanyp, tikeleı efırimen jańa býyndy baýraǵan alańǵa aınalyp otyr. Sondaı-aq, avtoqozǵalys mádenıeti men jol qaýipsizdigine degen jaýapkershilikti arttyrýǵa baǵyttalǵan bıýdjetten tys áleýmettik mańyzdy joba deýge tolyq negiz bar.
Jeke ınvestısııa esebinen boı kótergen «ASP» arena — kórermenderge jaıly trıbýnalarmen qatar, sımýlıatorlar men kartıng alańdary, demalys jáne tamaqtaný aımaqtary qarastyrylǵan. Eń bastysy — ekstrım alańdaryndaǵy qatysýshylardyń qaýipsizdigi tolyq qamtamasyz etilgen.
Nurpeıis QONYSBAI,
Avtomotosporttan memlekettik jattyqtyrýshy