Ulytaý oblysynda uly aqyn Abaı Qunanbaıulynyń 180 jyldyq mereıtoıyna arnalǵan mádenı-aǵartýshylyq onkúndik ótip jatyr.
Tórtinshi tamyz kúni Ulytaý aýdanyndaǵy Abaı eskertkishiniń janynda ádebı-sazdy kesh ótti. Oblystyń barlyq aýdandary men qalalarynda Abaı murasyn ulyqtaýǵa arnalǵan keshter, konsertter, kórmeler, shyǵarmashylyq kezdesýler bastalyp ketti.
Ulytaý oblysynyń mádenıet, tilderdi damytý jáne arhıv isi basqarmasynyń uıymdastyrýymen «Abaı – ult kerýeni» jobasy ult uıasy Ulytaý jerinen bastaý aldy. Osy «Abaı kerýeni» jobasy aıasynda oblys aýmaǵynda túrli is-sharalar uıymdastyryldy.
Sonyń biri – Ulytaý oblystyq ámbebap kitaphanasynda ótken «Abai-quiz» zııatkerlik oıyny. Jeti kezeńnen turatyn oıynǵa bes top qatysty. Ulytaý oblysynyń energetıka jáne turǵyn úı-kommýnaldyq sharýashylyq basqarmasynyń «Oıshyl» toby, qarjy basqarmasynyń «Aǵartýshy» toby, dene shynyqtyrý jáne sport basqarmasynyń «Sazger» toby, oblystyq memlekettik arhıviniń «Fılosof» toby, Taıjan Qalmaǵambetov atyndaǵy fılarmonııanyń «Qaıratker» toby synǵa tústi.
Hakim Abaıdyń ómiri men shyǵarmashylyǵy týraly qoıylǵan suraqtar aýyzsha, jazbasha, aýdıo, beıne, sýret túrinde berildi. Túrli salada qyzmet istep júrgen jas mamandar Abaıdyń shyǵarmashylyǵyna qyzyǵýshylyq tanytyp, qoıylǵan suraqtarǵa jarysyp jaýap bergeni janǵa jyly shýaq quıdy.
Oıyn sońynda eń kóp upaı jınaǵan Ulytaý oblysy qarjy basqarmasynyń «Aǵartýshy» toby jeńimpaz atanyp, arnaıy syılyq jáne dıplommen marapattaldy. Barlyq qatysqan toptarǵa alǵyshattar men syılyqtar tabystaldy.
Ulytaý oblysy