Úkimet Memleket basshysy Qasym-Jomart Toqaevtyń Mańǵystaý oblysynda týrızmdi damytý jónindegi tapsyrmalaryn júzege asyrý aıasynda «Mańǵystaý» týrıstik aımaǵyn damytýdyń 2025–2029 jyldarǵa arnalǵan keshendi josparyn bekitti. Tıisti qaýlyǵa Premer-mınıstr Oljas Bektenov qol qoıdy.
Qujatta 9 baǵyt boıynsha salalyq máselelerdi júıeli sheshý qarastyrylǵan. Onyń qatarynda ınfraqurylymdy damytý, logıstıka, sıfrlandyrý, qaýipsizdikti qamtamasyz etý, kadr daıarlaý, ınvestısııalyq jobalardy ilgeriletý men basqa da baǵyttar bar. Jospardy júzege asyrý kezeńinde 100-den astam is-shara uıymdastyrý kózdeledi.
Bolashaǵy zor 12 týrıstik nysannyń ishinde óńirdegi týrızmdi damytýdyń negizgi baǵyttarynyń biri Kendirli týrıstik aımaǵy bolyp belgilendi. Infraqurylymdyq máselelerdi sheshý, onyń ishinde ınjenerlik kommýnıkasııalar júrgizý, týrıstik nysandardy elektr qýatymen, sýmen jabdyqtaý men kólik qoljetimdiligimen qamtamasyz etý boıynsha sharalar kesheni iske asyrylady. Kendirli aýylynda joldar men basqa da nysandardy jóndeýden bólek, áýejaı salynady. Bul rette ınvestorlar men eko-belsendilerdiń usynysy eskerildi.
Aqtaý qalasynda teńiz vokzaly men halyqaralyq deńgeıdegi stadıon salý josparlanýda. Sondaı-aq óńirde týrızmdi nasıhattaý úshin mádenı-sporttyq is-sharalar ótkizý josparlanǵan. Keshendi jospar týrıster tartýǵa qolaıly jaǵdaı jasaýǵa jáne týrıstik aımaqty odan ári damytýǵa yńǵaıly ınvestısııalyq ahýal qalyptastyrýǵa múmkindik beredi. Sonymen qatar shaǵyn jáne orta bızneske serpin berý maqsatynda «Kaspıı ÁKK» AQ jelisi arqyly týrızm salasyn jeńildetilgen nesıeleý baǵdarlamasyn iske qosý da josparda bar. Jospar júzege asyrylǵannan keıin 2029 jylǵa qaraı ishki týrıster sany 430 myńnan 520 myń adamǵa, al kelýshi týrıster sany 89 myńnan 143 myń adamǵa deıin artady dep kútiledi. Týrızm salasynda jumyspen qamtylǵandar sany 1,7 myń adamnan 2,7 myń adamǵa deıin, jeke ınvestısııa kólemi – 198,9 mlrd teńgege deıin, al óńir ekonomıkasyndaǵy týrızm úlesi 2,2%-dan 3,6%-ǵa deıin ósedi.