Áıgili ǵalym Zeınolla Qabdolov «Balzakty oqymaı fransýz turmysyn, Tolstoıdy oqymaı orys ómirin, Abaıdy oqymaı qazaq tirshiligin bilem deý aǵat» degen edi.
Rasymen, qandaı da bir kórkem shyǵarma oqyrmanǵa beımálim ómirdi tanytady. Tanyta tura, adamdy tárbıeleıdi. Oǵan Kamerýn jazýshysy Benjamen Matıptiń myna bir sózi aıqyn dálel: «Men qazaqtar týraly esh nárse estip-bilgen emes edim. Al qazir men olardy bilemin, tipti, óte jaqsy bilemin, óıtkeni jýyrda aǵylshyn tilinde Muhtar Áýezovtiń keremet kitabyn oqydym. Men tamasha taǵdyr ıesi, qazaq halqynyń aqyny Abaımen tanystym. Beıne uzaq jyldar birge turyp, qaıǵy-qýanyshyn birge bólisken adamdaı jaqsy kórdim. Solarmen birge tipti darqan dalanyń tunyq aýasymen tynystaǵan sekildimin. Shynynda da, qazaq degenińiz ǵalamat sulý halyq eken ǵoı».