Túrkistanda qazaqtyń uly oıshyly, aqyny Abaı Qunanbaıulynyń týǵanyna 180 jyl tolýyna jáne «Abaı kúnine» oraı rýhanı mazmundaǵy is-shara ótti, dep habarlaıdy Túrkistan oblysy ákiminiń baspasóz qyzmeti.
Saltanatty jıynǵa oblys ákimi Nuralhan Kósherov, oblystyq ardagerler keńesiniń tóraǵasy Jeńisbek Máýlenqulov, eńbek ardageri Jarqynbek Qulbaıymbetov, oblystyq polısııa departamentiniń basshysy Murat Qabdenov jáne zııaly qaýym ókilderi qatysty. Qatysýshylar Túrkistandaǵy Abaı eskertkishine gúl shoqtaryn qoıyp, hakimniń rýhyna taǵzym etti.
Oblys ákimi Nuralhan Kósherov jınalǵandardy merekemen quttyqtap, Abaıdyń ónegeli ómiri men shyǵarmashylyq murasynyń el úshin mańyzyn atap ótti.
– Birneshe jyl buryn Memleket basshysynyń qoldaýymen 10 tamyz – «Abaı kúni» bolyp bekitildi. Bul – danyshpan aqynnyń rýhyna taǵzym etip, eńbekterin nasıhattaıtyn kún. Al bıyl uly oıshyldyń 180 jyldyq mereıtoıy el kóleminde atalyp ótýde. Osy mereke qurmetine Túrkistan oblysy atynan Abaı óńirine Kórme ortalyǵynyń qurylysyn tartý etemiz. «Birindi qazaq biriń dos, kórmeseń – istiń bári bos» dep eldi birlikke shaqyrǵan aqyn ósıetine adal bolý – bárimizdiń mindetimiz. Abaıdyń shyǵarmashylyǵyn nasıhattaý baǵytyndaǵy jumystar turaqty jalǵasady, – dedi óńir basshysy.
Jeńisbek Máýlenqulov óz sózinde Abaıdyń qazaq ádebıeti men rýhanııatyndaǵy aıryqsha ornyn atap ótip, jastarǵa arnaǵan taǵylymdy oılarymen bólisti.
Is-sharada aqynnyń óleńderi oqylyp, ánderi shyrqaldy. Zııaly qaýym ókilderi pikir bildirip, oblystyq kitaphanalar uıymdastyrǵan kitap kórmesi kópshilik nazaryna usynyldy.
Aıta keteıik, Túrkistan óńirinde Abaıdyń 180 jyldyǵyna arnalǵan on kúndik aıasynda rýhanı keshter, kórmeler, baıqaýlar, aýyl sharýashylyǵy ónimderiniń jármeńkeleri men mádenıet kúnderi ótti. Qazirgi tańda oblysta 1 aýyldyq okrýg, 4 eldi meken, 110 kóshe, 15 mektep Abaı esimimen atalady. Sondaı-aq uly aqyn qurmetine 9 eskertkish pen 11 bıýst ornatylǵan.