ASTANA. 5 tamyz. Búgin ÝEFA Chempıondar lıgasy irikteý týrnıriniń úshinshi raýndynda «Astana» Fınlıandııanyń HIK komandasyn qabyldady. «Astana-Arena» sport kesheninde ótken kezdesýde alań ıeleri 4:3 esebimen jeńiske jetip, irikteý týrnıriniń pleı-off básekesine joldama aldy. Bul týraly egemen.kz habarlady.
Elordalyqtar oıyndy óte súreńsiz bastady. Oıynshylardyń denesi áli qyzyp úlgermegen tusta qonaqtar esep ashyp ketti. Matchtyń 4-mınýtynda HIK-tiń shabýylshysy Osman Djalloý mergendigimen kózge tústi. Bul rette bizdiń qorǵaýshylardyń qateligin aıta ketken jón.
Apta buryn Helsınkıde ótken kezdesý 0:0 esebimen aıaqtalǵan bolatyn. Soǵan baılanysty HIK-tiń «Astana-Arenada» soqqan ár golynyń bási joǵary ekeni túsinikti. Sol sebepti, «Astana» oıynshylary kelesi aınalymǵa shyǵý úshin tek jeńiske jetýi tıis-tin.
О́z qaqpalaryna dop jiberip alǵannan keıin astanalyqtar jınaqylyq tanytqandaı bolǵan. Alaıda, matchtyń 41-mınýtynda taǵy da óreskel qatelik jiberip, qarsylastardyń ekinshi ret bizdiń qaqpany dál kózdeýine jol berip qoıdy. Atap aıtqanda, HIK oıynshylarynyń biri bizdiń aıyp alańǵa dopty áýelete asyrdy. Pastyń tym joǵary bolǵanyn eskergen alań ıeleri, sonyń ishinde qaqpashy Nenad Erıch sońyna deıin oınamaı, toqtap qaldy. Al sońǵy sátke deıin shabýyldaǵan Djalloý týra alań syzyǵynyń boıynan dopty keıin qaıtaryp qana qoımaı, óz áriptesine basymen tamasha pas shyǵaryp berdi. Mundaı múmkindikti múlt jibermegen Djıden Baa esepti eseledi.
Úziliske bir mınýt qalǵan kezde «Astana» shabýylshysy Patrık Tvýması aıyp alańynyń syrtynan soqqy jasap, esep aıyrmasyn qysqartty.
Ekinshi taımdy alań ıeleri óte belsendi bastady. 46-mınýtta HIK oıynshylarynyń biri óz aıyp alańynda qolymen oınap, erejege qaıshy áreket jasady. Kezdesýdiń bas tóreshisi Alon Efet oılanbastan on bir metrlik núkteni kórsetti. Bul rette tamasha soqqysymen kózge túsken Roher Kanıas tarazy basyn teńestirdi. Arada 9 mınýt ýaqyt ótkende Dmıtrıı Shomko óte ádemi soǵylǵan goldyń avtory atanyp, «Astanany» esepte alǵa shyǵardy.
Kezdesýdiń 70-mınýtynda Tvýması alańnan qýylyp, bizdiń komanda qalǵan ýaqytta 10 oıynshymen oınaýǵa májbúr boldy. Bir fýtbolshysy artyq qonaqtar basymdyqqa ıe bolyp, shabýyl shebin kúsheıtti. Matchtyń 86-mınýtynda degenderine jetti. Tóreshi endi bizdiń qaqpaǵa penaltı belgilep, Erfan Zenelıdiń nátıjeli soqqy jasaýyna múmkindik berdi.
Degenmen, alǵashqy taımdaǵy qatelikten nátıje shyǵarǵan astanalyqtar 93-mınýtta tórtinshi dopty soǵyp, klýb tarıhyndaǵy mańyzdy jeńiske qol jetkizdi. Bul jeńisinen keıin «Astana» kem degende Eýropa lıgasynyń toptyq kezeńine joldama alǵanyn aıta keteıik.
ÝEFA Chempıondar lıgasy. Irikteý týrnıriniń úshinshi raýndy.
«Astana» (Astana, Qazaqstan) – HIK (Helsınkı, Fınlıandııa) 4:3 (1:2)
5 tamyz. Astana. «Astana-Arena» sport kesheni. 20 000 kórermen.
Tóreshiler: Alon Efet, Roı Hassan, Sagı Mazamber (bári de – Izarıl).
«Astana»: Nenad Erıch, Marın Anıchıch, Branko Ilıch (Jýnıor Kabananga 46), Evgenıı Postnıkov, Nemanıa Maksımovıch, Georgıı Jýkov, Tańat Nóserbaev (Abzal Beısebekov 60), Dmıtrıı Shomko, Roher Kanıas, Baýyrjan Jolshıev, Patrık Tvýması.
HIK: Danıel Erlýnd, Djıden Baa, Markýs Heıkkınen, Valtterı Moren, Rasmýs Shýller, Erfan Zenelı, Gı Moýssı, Sebastıan Sorsa, Atomý Tanaka, Maık Havenar, Osman Djalloý.
Goldar: Patrık Tvýması 44, Roher Kanıas 47, penaltı, Dmıtrıı Shomko 56, Evgenıı Postnıkov 90+3 – Osman Djalloý 4, Djıden Baa 41, Erfan Zenelı 86, penaltı.
Eskertýler: Branko Ilıch 45 – Valtterı Moren 75.
Alańnan qýyldy: Patrık Tvýması 70.
Elaman Qońyr.
Derek: egemen.kz.
Sýret: footboom.kz.