ATYRAÝ. 5 tamyz. Atyraý oblysynyń prokýrorlary aýyz sý júıesin qamtamasyz etýge bólingen qarajat esebinen jalpy quny 272 175 506 teńgeniń jumys aýqymy atqarylmaı qalǵanyn anyqtady. Bul týraly oblystyq prokýratýraǵa silteme jasaǵan egemen.kz tilshisi habarlady.
Elbasynyń Joldaýlarynda, sonymen birge, «О́ńirlerdi damytý-2020» baǵdarlamasynda halyqty sapaly aýyz sýmen qamtý máselesine erekshe kóńil bólinip otyr. Osyǵan oraı Atyraý oblysynyń prokýratýra organdary «Aq Bulaq» baǵdarlamasynyń júzege asyrylýyn jiti baqylaýǵa aldy. Prokýratýra qyzmetkerleri júrgizgen tekserýler nátıjesinde bıýdjet qarajatyn negizsiz jumsaý, eldi mekenderdi aýyz sýmen tolyq qamtamasyz etpeý, merziminde aıaqtalmaǵan jumystar úshin aıyppuldar eseptemeý, sanıtarlyq-epıdemıologııalyq normalardyń buzylý faktileri anyqtaldy. Máselen, Inder aýdanynyń ortalyqtandyrylǵan jáne ortalyqtandyrylmaǵan sý berý júıesindegi aýyz sý sapasyna zertteýler júrgizilip, nátıjesinde Eltaı aýylyndaǵy sý tunbasynda hlor qaldyǵynyń bolmaǵany anyqtaldy. Sonymen birge, mıkrobıologııalyq zertteýlerdiń nátıjesinde sý quramynda jalpy kolıform jáne termotolerant kolıform bakterııalarynyń bar ekendigi anyqtalǵan.
«Atyraý oblysynda aýyz sý júıesin qamtamasyz etýge bólingen qarajattyń esebinen jalpy quny 272 175 506 teńgeni quraıtyn jumys aýqymy atqarylmaı qalǵan», delingen oblystyq prokýratýra taratqan habarlamada. Atalǵan másele oblys prokýrory Ǵalymjan Toǵyzbaevtyń tóraǵalyǵymen ótken alqa májilisinde keńinen talqyǵa tústi. Alqa májilisinde qaralǵan másele boıynsha oblys ákimine jáne ózge de ýákiletti organdarǵa tıisti prokýrorlyq yqpal etý aktileri engiziletin boldy.
Joldasbek Shópeǵul.
Derek: Atyraý oblystyq prokýratýrasy.
Sýret: azh.kz.