QOSTANAI. 5 tamyz. Qostanaı oblysy Qarabalyq aýdandyq ishki ister bóliminiń bastyǵy Derbes Jarmaǵambetov aýdan ortalyǵyndaǵy dúkenge túsken úsh qaraqshynyń izin sýytpaı ustaýǵa kómektesken Vıktor Savchenkoǵa alǵys hat tapsyrdy. Bul týraly egemen.kz tilshisi habarlady.
Keshki saǵat 20:00-de polısııanyń kezekshilik bólimine belgisiz úsh adamnyń «Elıt» dúkenin tonap, qashyp ketkeni týraly dabyl túsedi. Dúkenshi bir adamnyń syrtta qalyp, ekeýi dúkenge kirip, ózin qorqytyp, kassadaǵy aqshany alyp ketkenin habarlaıdy. Ishki ister bólimi búkil quramdy dabylmen jedel kóteredi.
Osy kezde Qarabalyq turǵyny Vıktor Savchenko «Elıt» dúkenine qaraı kóligimen kele jatady. Ol kele bergende úsh adamnyń dúkennen shyǵa kelgenin baıqap, olardyń sýyt júrisin sezedi. Dereý dúkenge kirip, dúkenshi bolyp isteıtin óziniń qaıyn enesiniń aman ekenin kóredi de, qylmyskerlerdiń artynan qýa jóneledi. Ekeýine kóshede qýyp jetkenimen, olar qashyp ketedi. Úshinshisin kóligine otyrǵyzyp, oqıǵa ornyna alyp keledi. Polıseıler qalǵan eki uryny sol táýlikten qaldyrmaı qolǵa túsirdi. Onyń bireýin bir úıden, ekinshisin basqa úıdiń tóseginiń astyna tyǵylǵan jerinen ustaǵan. Qaraqshylyq kórsetken úsheýi de buryn sottalǵan, 24-26 jastaǵy jigitter eken.
Qarabalyq aýdandyq ishki ister bóliminiń basshylyǵy qylmyskerlerdi ustaýdaǵy erlik isi úshin Vıktor Savchenkoǵa alǵys hat tapsyrdy.
Názıra Járimbetova.
Derek, sýret: egemen.kz.