«Starlink» kompanııasy kúni keshe el aýmaǵynda resmı túrde spýtnıktik ınternet qyzmetin iske qosty.
Sıfrlyq damý, ınnovasııalar jáne aeroǵarysh ónerkásibi mınıstrliginiń málimetinshe, endi elimizdiń turǵyndary «SpaceX» kompanııasyna tıesili tómen orbıtalyq spýtnıkter jelisi arqyly joǵary jyldamdyqty jáne senimdi ınternetke qosyla alady.
Eske sala ketsek, osy jyldyń 12 maýsymynda Sıfrlyq damý, ınnovasııalar jáne aeroǵarysh ónerkásibi mınıstrligi men «Starlink» kompanııasy qyzmet kórsetý kezinde Qazaqstan zańnamasyn saqtaýdy mindetteıtin kelisimge qol qoıǵan edi.
«Starlink» tehnologııasy shalǵaı óńirlerde de turaqty qosylymdy qamtamasyz etip, halyqqa zamanaýı sıfrlyq servısterdi paıdalanýǵa múmkindik beredi. «Starlink» qyzmetiniń aılyq tarıfi 23 myń teńgeden bastalady, al termınaldyń baǵasy shamamen 104 myń teńge. Bul týraly Sıfrlyq damý, ınnovasııalar jáne aeroǵarysh ónerkásibi vıse-mınıstri Dosjan Musalıev «Jibek Joly» telearnasynyń «Búgin LIVE» baǵdarlamasynda aıtty.
«Tarıfter men qurylǵy baǵasy qoldaný túrine baılanysty ózgeredi. «Starlink» qyzmeti jeke tulǵalarmen qatar bıznes úshin de qoljetimdi», dedi ol.
Vıse-mınıstr el aýmaǵynyń keńdigine baılanysty barlyq óńirdi kabeldik ınternetpen tolyq qamtý múmkin emestigin, sondyqtan spýtnıktik baılanys – eń tıimdi sheshimderdiń biri ekenin atap ótti. Qazirgi tańda el aýmaǵy túgeldeı derlik «Starlink» jelisimen qamtylǵanymen, shekaraǵa jaqyn keıbir aımaqtarda sıgnaldyń álsireýi múmkin ekenin de eskertti.
Amerıkalyq kásipker Ilon Mask negizin qalaǵan «SpaceX» kompanııasynyń spýtnıktik ınterneti búginde álemniń kóptegen elinde qoldanylady. «Starlink» dep atalatyn bul ǵalamdyq júıe shalǵaıdaǵy aýyldardy, ashyq teńizdegi kemelerdi ınternetpen qamtamasyz etýge jáne avtokratııalyq elderde aqparatty senzýrasyz taratýǵa arnalǵan. Osy maqsatta kompanııa Jerdiń tómengi orbıtasyna shamamen 2 300 spýtnık ushyrǵan.