Prezıdent Qasym-Jomart Toqaevtyń bastamasymen 2022 jyldan beri osy halyqaralyq jarystarda medal alǵan oqýshylar men olardyń ustazdaryna qarjylaı syıaqy beriledi.
Qazaqstan – olımpıada jeńimpazdaryn yntalandyrýdyń mundaı júıesin engizgen sanaýly elderdiń biri.
Búgingi oqýshylar hımııa (IChO), matematıka (IMO), fızıka (IPhO), bıologııa (IBO), geografııa (IGeO), lıngvıstıka (IOL) jáne ınformatıka (IOI) pánderi boıynsha álemdegi eń myqty komandalarmen laıyqty básekelesip, jeti iri halyqaralyq zııatkerlik olımpıadada jarqyn jeńisterge qol jetkizdi.
Bıyl ulttyq quramamyzdyń qorjynyna 27 medal qosyldy. Biz geografııa páninen álemde ekinshi oryn aldyq, hımııadan úsh márte álem chempıony atandyq, ǵylymı fızıkadan absolıýtti chempıon boldyq, al Balqan matematıkalyq olımpıadasynda eki jyl qatarynan eń úzdik úsh komandanyń qataryna kirdik.
Joǵary dárejeli marapattardyń sany eki ese artty. Halyqaralyq zııatkerlik jarystarǵa qatysqan árbir ekinshi oqýshy elge júldemen oraldy. 2024–2025 oqý jylynda 34 olımpıada men baıqaýda el namysyn qorǵaǵan 1712 oqýshynyń 1002-si júldeger atandy, onyń ishinde 193-i altyn medal ıelendi.
Bul derekter – oqýshylarymyzdyń zııatkerlik saıystardaǵy jetistikteriniń senimdi ósimin, olardyń talanty men eńbeksúıgishtigin, ustazdardyń kásibı sheberligin jáne memleket tarapynan kórsetiletin joǵary senim men qoldaýdyń aıqyn dáleli.
Al bıylǵy Tamyz keńesiniń bererine kelsek, biz daryndy balalardy daıyndaýdyń qyr-syryn úıretetin seksııalarǵa qatysyp, ózimizge kóp qor jınap aldyq. Onda respýblıkalyq deńgeıdegi mamandar bilgenin úıretip, elimizdiń zııatkerlik áleýetin álemdik arenada kórsetetin el erteńin qanat qaqtyrýǵa shabyt syılady.
Janar BEISENBAEVA,
«Astana daryny» ortalyǵynyń dırektory