Úkimette ótken jıynda kún tártibinde tórt másele qaraldy. Qazaqstan Respýblıkasynyń sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev baıandama jasady, dep jazady Egemen.kz.
Memlekettik organdardyń aqparattyq júıelerin ıntegrasııalaýdyń keshendi jospary negizinde 224 aqparattyq quramdas alań qurylady. Bul ıntegrasııa úshin eńbek shyǵyndaryn azaıtýǵa, fýnksıonaldyq jáne statıstıkalyq aıyrmashylyqtar turǵysynan aqparattyq júıelerdiń qaıtalaný máselesin sheshýge múmkindik beredi. Búgingi tańda «elektrondyq úkimet» aıasynda memlekettik organdar men kvazımemlekettik sektor uıymdarynyń 355-ten astam aqparattyq júıeleri men veb-resýrstary jumys isteıdi.Jasandy ıntellekt derekter massıvterimen jumys isteý erejesi jáne ony júzege asyrý jospary bekitildi. Qujat JI tehnologııalaryn damytý úshin derekter qoryn qalyptastyrý máselesin qarastyrady. Bul erejeler aqparatty jınaý, tekserý jáne qurylymdaýdyń biryńǵaı standarttaryn qarastyrady.Smart Data Ukimet platformasynda memlekettik derbestendirilmegen derekterdi toptaý boıynsha jumys sheńberinde Smart Data Ukimet-ke mindetti túrde kóshirýge jatatyn derekter bazalarynyń tizimi bekitildi.Jıynda AITU ulttyq messendjerin keń aýqymda engizý máselesi qaraldy. Onyń pılottyq jumysy Sıfrlyq damý, ınnovasııalar jáne aeroǵarysh ónerkásibi mınıstrliginde kórsetildi, endi atalǵan qyzmet memlekettik organdar men kvazımemlekettik sektor uıymdarynyń barlyǵyna engiziledi. Messendjerge kóshý merzimi 15 qyrkúıekke deıin bekitildi.
Premer-mınıstr qabyldanǵan qujattardy sapaly ári ýaqtyly iske asyrýdyń mańyzdylyǵyn atap ótti.
«Memleket basshysy Qazaqstan Eýrazııadaǵy sıfrlyq habqa aınalýy tıis degen maqsatty alǵa qoıyp otyr. Naqty mindetter belgilendi. Búgingi tańda Sıfrlyq shtab barlyq memlekettik organ men uıymdar úshin mindetti sheshimder qabyldady. Nátıje aqparattyq qaýipsizdikti jaqsartýǵa jáne memlekettik apparattyń tıimdiligin arttyrýǵa baǵyttalǵan», dedi Oljas Bektenov.