Ústimizdegi jyldyń 26 sáýirine belgilengen Qazaqstan Respýblıkasy Prezıdentiniń saılaýyna baıqaý júrgizetin Respýblıkalyq qoǵamdyq komıssııanyń oblystyq fılıaly óz jumysyn bastady. Osyǵan oraı, oblystyq «Qazaqstan – Aqtóbe» telearnasynyń májilis zalynda qoǵamdyq komıssııanyń ashylýyna arnalǵan brıfıng ótkizildi.
Onyń quramyna belgili ǵalymdar, qoǵam qaıratkerleri, BAQ pen jastar uıymdarynyń ókilderi kirdi. Olar elektoraldy naýqannyń ashyq ári shynaıy ótýine baqylaý júrgizetin bolady. Brıfıngte komıssııa tóraǵasy, Q.Jubanov atyndaǵy Aqtóbe óńirlik memlekettik ýnıversıtetiniń ekonomıka jáne quqyq ınstıtýtynyń dırektory Halel Qusaıynov bul týraly jan-jaqty baıandady.
Ol komıssııa jumysynyń basty baǵyty oblysta saılaý týraly zańnyń saqtalýyna kandıdattardyń saılaýaldy shtabtarymen, BAQ jáne saılaý komıssııalarymen baqylaý júrgizý ekenin tilge tıek ete kelip, komıssııa músheleri saılaý naýqanyna qatysýshy barlyq kandıdattarǵa birdeı jaǵdaı jasalýyn qamtamasyz etetinin, saılaý úderisin buzýdyń kez kelgen áreketteriniń jolyn kesip, olardy ýaqtyly túzetip, ákimshilik resýrstar tarapynan oryn alýy múmkin áreketterdi boldyrmaý boıynsha jumystar jasaıtynyn jetkizdi.
Qoǵamdyq komıssııa músheleriniń basym bóliginiń atalǵan salada tájirıbesi bar, olar 2011 jyly ótkizilgen prezıdenttik saılaý men 2012 jylǵy parlamenttik saılaýǵa baıqaýshy esebinde belsendi qatysqan azamattar.
Satybaldy SÁÝIRBAI,
«Egemen Qazaqstan».
Aqtóbe oblysy.