Prezıdent Qasym-Jomart Toqaev bıylǵy Joldaýynda elimizdiń damý tarıhyndaǵy jańa kezeńdi aıqyndaıtyn bastamany jarııa etti. Bul – «Alatau City» jobasy. Memleket basshysy jańa qalanyń elimizdiń iskerlik jáne ınnovasııalyq ortalyǵyna aınalatynyn atap ótti.
Prezıdent naqty tapsyrma berdi: on kún ishinde qalaǵa arnaıy mártebe berý týraly Jarlyq jobasy daıyndalyp, alty aı ishinde «Alatau City týraly» jeke zań qabyldanady. Qujatta qalany basqarý rejimi, qarjylyq model, ınvestorlarǵa kepildikter jáne turǵyndarǵa arnalǵan áleýmettik-ekonomıkalyq tetikter qarastyrylmaq.
Bul bastama halyqaralyq tájirıbege negizdelgen. Álemde arnaıy mártebege ıe qalalar ınvestısııa men tehnologııany tartýdyń negizgi ortalyqtaryna aınalǵan. Shenchjen, Sıngapýr, Dýbaı – sonyń aıqyn mysaldary. 2 qyrkúıekte Beıjińde Qazaqstan men Qytaı arasynda kelisim jasaldy. Bul qujatqa Ulttyq ınvestısııalyq korporasııa, «Caspian Group» AQ jáne Qytaıdyń alyp qurylys kompanııasy – «CSCEC International Construction Corporation Ltd» qol qoıdy.
Alatau City jeke ınvestısııalar esebinen salynady. Biz sheteldik ınvestorlardyń pýlyn qurdyq. Bul jobaǵa AQSh, Ońtústik Koreıa, Sıngapýr, Taıaý Shyǵys elderi de qyzyǵýshylyq tanytyp otyr. Qazan aıynda Seýlde roýd-shoý ótedi. Oǵan «Hyundai», «Samsung», «Lotte» sekildi alpaýyt korporasııalar qatyspaq. Sıfrlyq qala – bolashaqtyń beınesi.
Almaty aglomerasııasynda boı kóteretin jańa qala Ortalyq Azııadaǵy alǵashqy tolyq sıfrlyq qala bolmaq. Munda Smart City tehnologııalary engiziledi, krıptovalıýta arqyly tólem jasaý múmkindigi paıda bolady, jasandy ıntellektige negizdelgen basqarý júıeleri qoldanylady. Bul qadamdar jańa qalanyń sıfrlyq ekojúıe retinde damýyna berik irgetas bolmaq.
Joba iske qosylǵanda myńdaǵan jańa jumys orny ashylady, IT jáne joǵary tehnologııa ındýstrııasy qarqyn alady, sheteldik ınvestısııalar kólemi artady. Sonymen qatar jańa qala jastarǵa bilim men jumystyń zamanaýı múmkindigin usynyp, jańa ýrbanıstıkalyq mádenıetti qalyptastyrady.
Prezıdent Qasym-Jomart Toqaevtyń Joldaýynda kóterilgen bastamalar – elimizdiń jańa damý kezeńine jol ashatyn tarıhı qadam. Ásirese Alatau City jobasyn júzege asyrý týraly sheshim – elimizdiń ınnovasııalyq áleýetin arttyryp, eldi halyqaralyq deńgeıde jańa bıikke kóterýge baǵyttalǵan mańyzdy bastama.
Memleket basshysynyń batyl ári strategııalyq qadamdaryna rızashylyq bildiremiz. Bul bastamalar elimizdi sıfrlyq dáýirdiń kóshbasshysyna aınaldyryp, jańa jumys oryndaryn ashýǵa, jastarǵa bilim men kásipkerlikke jol kórsetýge múmkindik beredi. Prezıdentimizdiń senimdi basshylyǵymen elimizdiń bolashaǵy jarqyn bolaryna senemiz. Alatau City ulttyń jańa dáýirge qadam basýynyń rámizi bolmaq.
Iýrıı SHAI,
«Caspian Group» AQ dırektorlar keńesiniń tóraǵasy