PETROPAVL. 20 naýryz. Oblys ortalyǵyndaǵy № 20 qazaq mektebinde tuǵyry bólek, ult úshin týǵan jampoz Jumabek Táshenevke eskertkish-músin qoıylyp, murajaı ashyldy. Bul týraly oblystyq ákimdiktiń baspasóz qyzmeti habarlady.
N. Hrýshevtyń quryq boılamaıtyn zymııandyq saıasaty saldarynan qazaqtyń ulan-baıtaq jeri bólshektenip kete jazdaǵan tusta arystandaı aıbat, jolbarystaı qaırat kórsetip, el tutastyǵynyń saqtalyp qalýyna birden-bir sebepker bolǵan belgili memleket jáne qoǵam qaıratkerin soltústikqazaqstandyqtar da erekshe qurmetteıdi. 1947-1952 jyldary-oblatkom tóraǵasynyń orynbasary, tóraǵasy bolǵan kezeńde óńir ekonomıkasyn, mádenıetin, rýhanııatyn damytýǵa qosqan úlesi ólsheýsiz. Kópten beri esimi eleýsiz bolyp kelgen nar tulǵanyń 100 jyldyq mereıtoıy qarsańynda Petropavl qalasyndaǵy № 20 mektepke atyn berý týraly kópshiliktiń usynystary Úkimet tarapynan qoldaý tapty. Endi, mine, osy oqý ordasy aldyna eskertkish-músin ornatylyp, murajaı ashylyp, marqumnyń týǵan-týystarynyń, zııaly qaýym ókilderiniń, jastardyń, oqýshylardyń qatysýmen saltanatty jaǵdaıda ótti.
Oblys ákimi Erik Sultanov jınalǵandardy aıtýly oqıǵamen quttyqtady. Marqumnyń uly Saıan Jumabekuly áke jaıly jyly esteliktermen, ár jyldary qyzmet atqarǵan Soltústik Qazaqstan oblysynyń qurmetti azamaty Jaqsylyq Ysqaqov jarqyn beıne jaıly áserlerimen bólisti.
Eskertkish-músinniń avtory, búginde T. Júrgenov atyndaǵy Qazaq ulttyq óner akademııasynda kafedra meńgerýshisi qyzmetin atqaratyn Málik Júnisbaevtyń esimi de qyzyljarlyqtarǵa jaqsy tanys.Kezinde Úkili Ybyraıdyń músinin tamasha somdaǵan sheberge tańdaýdyń túsýi beker emes. Onyń ózine júktelgen mindetti úlken jaýapkershilikpen atqaryp shyqqan. Parasatty kelbet, qaısar rýh músindekelisim tapqan.
Mártebeli qonaqtar murajaıdyń tusaýkeserine qatysyp, qaıratkerdiń jeke zattarymen, eńbek, ómir joldarynan syr shertetin shyǵarmalarmen, jazbalarmen, esteliktermen tanysty.
S. Muqanov atyndaǵy ámbebap kitaphanada «Máńgilik eldiń parasatty tulǵasy – Jumabek Táshenev» taqyryby boıynsha dóńgelek ústel uıymdastyrylyp, baıandamalar tyńdaldy.
О́mir Esqalı.
Derek, sýret: Soltústik Qazaqstan oblysy ákimdiginiń baspasóz qyzmeti.