Memleket basshysy Qasym-Jomart Toqaev Qazaqstan halqyna Joldaýynda ekonomıkanyń barlyq salasyn jańǵyrtý maqsatynda jasandy ıntellektini engizýge erekshe nazar aýdara otyryp, eldi odan ári damytý jónindegi 7 negizgi mindetti atap ótti.
Joǵary oqý oryndary, ásirese, medısınalyq mekemeler mundaı ózgeristerge jedel áreket etýi kerek. Kásibı jáne básekege qabiletti mamandardy daıarlaý – Qaraǵandy medısına ýnıversıtetiniń basym mindeti. Búgingi tańda ýnıversıtet sıfrlyq tehnologııalardy belsendi qoldanady, bilim berý, ǵylymı úderisterdiń, medısınalyq qyzmetterdiń ashyq-tyǵyn, yńǵaılylyǵyn qamtamasyz etedi. «QMÝ» KeAQ-da jasandy ıntellektini qoldana otyryp iske asyrylyp jatqan jobalar, eń aldymen, dárigerlerdi daıarlaý sapasyn arttyrýǵa baǵyttalǵan.
Jalpy, densaýlyq saqtaý salasyn damytýǵa memlekettik sharalardy kúsheıtý qajet. Qazir elimizde medısına nysandary birtindep jańǵyrtylyp keledi. Aýyl-aımaqtaǵy feldsherlik-akýsherlik pýnktterden bastap mamandandyrylǵan aýrýhanalarǵa deıin jańa qondyrǵylarmen qamtylyp jatyr.
Medısınalyq bilimge de jańa kózqaras, mindetter qajet. Zamanaýı tehnologııaǵa saı jas mamandar úlken daǵdylar men quzyretterdi, progressıvti kózqarastardy damytýy kerek. Máselen, bizdiń ýnıversıtette bolashaq dárigerlerdiń sapaly bilim alýyna kóp múmkindik bar, joǵary bilikti professorlyq-oqytýshylar quramy, baı klınıkalyq bazalar, bilim berý jáne ǵylymı ortalyqtar, halyqaralyq yntymaqtastyq jolǵa qoıyldy.
Aýyl-aımaqtaǵy densaýlyq saqtaýdy jańǵyrtyp, kúsheıtý maqsatynda ýnıversıtet mamandar daıarlaýdy kúsheıtti, onyń ishinde skrınıngtik zertteýlerdiń erekshelikterine, aýrýlardyń túrlerine, pasıentterdi dınamıkalyq turǵyda baıqaýǵa basa nazar aýdaryp otyrmyz. Aýyldyq jerlerge jumysqa keletin jas dárigerlerge áleýmettik qoldaý kórsetiledi. Osylaısha, azamattar turǵylyqty jerine qaramastan densaýlyq saqtaý júıesiniń zamanaýı múmkindikterine teń qol jetkize alady. Memleket basshysy óziniń Joldaýynda osy Ulttyq jobany tabysty iske asyrýdy mindet etip qoıyp otyr. Osy oraıda «Pedıatrııa» mamandyǵyn qalpyna keltirip, 14 tapshy balalar mamandyǵy boıynsha rezıdentýrany engizip otyrmyz. Sondaı-aq «QMÝ» KeAQ kópbeıindi stasıonarlarǵa arnalǵan maman daıarlaý kezinde dárigerdiń kásibı quzyrettiligin jetildirýge den qoıdyq. Buǵan qosa jalpy medısınalyq bilim berý júıesinde sımýlıasııalyq ortalyqtardy, túrli qashyqtan oqytý platformalary arqyly dárigerlerdiń, meıirgerlerdiń úzdiksiz kásibı damýyn belsendi júzege asyryp kelemiz. Qaraǵandy medısına ýnıversıtetiniń túlekteri qazir elimizdiń densaýlyq saqtaý salasyn damytýda mańyzdy jobalardyń basy-qasynda júr.
Memleket basshysynyń taǵy da alǵa qoıǵan mindetteriniń biri – ǵylymı zertteýlerge de mán berý qajet. Bul rette Prezıdent farmasevtıka salasyndaǵy jumysty jandandyrý qajettigin naqty tapsyrdy. Jalpy, Qaraǵandy medısına ýnıversıtetinde jańa belsendi zattardy izdeý, dárilik preparattardyń tıimdiligin baǵalaý boıynsha ǵylymı zertteýler júrgizýge qajetti resýrstar bar. Ýnıversıtet ǵalymdary da jańa ınnovasııalyq dúnıelerdi zerttep, zerdeleýge beıim. «Qaraǵandy medısına ýnıversıteti» KeAQ Memleket basshysynyń Joldaýynda aıtylǵan bastamalaryn qoldap, olardy sapaly iske asyrýǵa ázir.
Baqyt KО́ShEROVA,
Qaraǵandy medısına ýnıversıtetiniń basqarma tóraǵasy – rektor