ASTANA. 20 naýryz. Keshe qazaqstandyq Danııar Kesikbaev Malaızııa premer-mınıstriniń qyzy Nadjıba Razaka Nýrıane Nadjvege úılendi. Bul týraly The Straits Times habarlady.
Agenttiktiń habarlaýynsha, toı 19 naýryz kúni premer-mınıstrdiń Pýtradjaıa qalasyndaǵy «Seri Perdana» atty rezıdensııasynda ótken. Ol eldiń astanasy Kýala-Lýmpýrǵa jaqyn jerge ornalasqan. Oǵan Malaızııa koroli Abdýl Halım Mýadzam Shah, mınıstrler, elshiler men dıplomattar qatysqan. Sondaı-aq Ábý-Dabı men Saýyd Arabııasynan qonaqtar kelgen.
Jas jubaılar AQSh-ta oqyp júrgende tanysqan. Portaldyń málimetinshe, Danııar bolashaq qalyńdyǵyna alǵash ret 2011 jyly 17 maýsymda saqına taqqan eken. Saltanatty rásim premer-mınıstrdiń rezıdensııasynda ótken.
Aıta keteıik, Nadjva Vashıngtondaǵy ýnıversıtterdiń birinde halyqaralyq qatynastar mamandyǵy boıynsha bilim alǵan. Qazirgi kezde belgili bir kompanııada qyzmet etedi. Al Danııar Kesikbaev Nıý-Iorktegi Kolýmbııa ýnıversıtetin bitirgen.
Taǵy bir derek, Danııar osydan birneshe jyl buryn Qazaqstannan qashyp ketken aty tanymal Maıra Qurmanǵalıevanyń uly eken.
Murat Aıtqoja.