Úkimet otyrysynda Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýyn júzege asyrý jónindegi Jalpyulttyq is-sharalar jospary qaraldy. Qujat 87 is-sharadan turady. Onyń negizgi baǵyttary týraly Premer-mınıstrdiń orynbasary – ulttyq ekonomıka mınıstri Serik Jumanǵarın baıandady, dep habarlaıdy Egemen.kz.
«Jospar negizgi 8 baǵyttan turady, onyń ishinde jańa ınvestısııalyq saıasat, ónerkásipti nyǵaıtý, AО́K damytý, kóliktik áleýetti júzege asyrý, TKSh jańǵyrtý, kásipkerlikti qoldaý, adamı kapıtaldy damytý jáne parlamenttik reformany júrgizý bar», dedi Serik Jumanǵarın.
Vıse-Premerdiń aıtýynsha, ınvestorlardyń quqyqtaryn qorǵaýdy kúsheıtý úshin Bas prokýratýra janyndaǵy Aktıvterdi qaıtarý komıteti Investorlardyń quqyqtaryn qorǵaý komıteti bolyp qaıta qurylady. Sondaı-aq joǵary tehnologııalyq sektorlarǵa Ulttyq qordan 1 mlrd AQSh dollaryna deıin ınvestısııa tartylmaq.
2026 jyldyń qańtaryna deıin jańa «Bankter týraly» zań qabyldanyp, ol bank naryǵyna jańa qatysýshylardy kirgizýge jáne qarjy resýrstaryn naqty ekonomıkaǵa baǵyttaýǵa múmkindik beredi.
Jospar aıasynda Alatau city aýmaǵynda iskerlik belsendilik pen ınnovasııalar ortalyǵy qurylady. Munda krıptoaktıvter arqyly tólem jasaýǵa jol ashatyn krıpto-fıat arnalaryn engizý kózdelgen.
Sonymen qatar Ulttyq bankpen birlesip, sıfrlyq aktıvterdiń tolyqqandy ekojúıesin qalyptastyrý úshin Memlekettik sıfrlyq aktıvter qory qurylatyn bolady.