Memleket basshysy Joldaýda ınvestısııa tartý men eldiń ınvestısııalyq ahýalyn jaqsartýdyń mańyzdylyǵyn taǵy da atap ótti. Qazirgi geosaıası turaqsyzdyq pen álemdik ekonomıkanyń údemeli fragmentasııasy jaǵdaıynda bul mindet erekshe mánge ıe.
El úshin bul tek básekege qabilettilikti saqtap qalý ǵana emes, sonymen qatar ártaraptandyrýǵa, ınnovasııalarǵa, ınstıtýsıonaldyq ortany damytýǵa negizdelgen jańa damý núktelerin qalyptastyrý qajettigin bildiredi. 2025 jyldyń birinshi toqsanynyń qorytyndysynda el ekonomıkasyna 6,6 mlrd dollar ınvestısııa tartyldy. Bul byltyrǵy jyldyń dál osy kezeńimen salystyrǵanda 6,2%-ǵa artyq. Jalpy alǵanda, 2005 jyldan beri elge 424,3 mlrd dollar kóleminde ınvestısııa tartylǵan. Syrtqy syn-qaterlerge qaramastan, Qazaqstan halyqaralyq reıtıngterde oń belgiler kórsetip te otyr. Máselen, S&P agenttigi elimizdiń jaǵdaıy boıynsha boljamdy «turaqtydan» «pozıtıvtige» jaqsartyp, «BBB-» reıtıngin rastady. Sonymen qatar «World Competitiveness Ranking 2025» reıtınginde bir satyǵa kóterilip, 34-oryndy ıelendik.
Jahandyq jáne óńirlik ınvestısııalar úshin básekelestik kúsheıip jatqan jaǵdaıda elimiz ınvestorlarǵa ınstıtýsıonaldyq qoldaýdy arttyrdy. Osy maqsatta «bir tereze» qaǵıdaty boıynsha jumys isteıtin Investısııalar tartý keńesi (ınvestısııalyq shtab) quryldy. Onyń negizgi mindeti – týyndaıtyn máselelerdi jedel sheshý, jobalardy iske asyrýdyń barlyq kezeńinde kómektesý jáne jańa bastamalardy jedel iske qosý. Shtabtyń basty maqsaty – eldiń ınvestısııalyq tartymdylyǵyn arttyrý jáne otandyq ári sheteldik kompanııalar úshin qolaıly jaǵdaı jasaý. Sonymen birge Memleket basshysy Aktıvterdi qaıtarý komıtetin Investorlardyń quqyqtaryn qorǵaý komıteti dep qaıta ataýdy tapsyrdy.
Investısııalyq tartymdylyqty odan ári arttyrý maqsatynda ótken jyldyń qazan aıynda 2029 jylǵa deıingi ınvestısııalyq saıasat tujyrymdamasy bekitildi. Bul saıasattyń negizgi maqsattary: negizgi kapıtalǵa ınvestısııalardy IJО́-niń 23%-yna deıin ulǵaıtý; syrtqy ınvestısııalar úlesin 30%-ǵa deıin jetkizý; 150 mlrd dollar tikeleı sheteldik ınvestısııa tartý. Investısııa tartýdyń jańa tásili ekonomıkanyń naqty salalarynyń qajettilikterin eskerýge negizdelgen. Investısııalarǵa «tapsyrystar» otandyq bıznes pen kvazımemlekettik kompanııalardyń suranysyna qaraı qabyldanbaq. Bul ınvestısııalyq saıasattyń nysanaly baǵyty men tıimdiligin arttyrýǵa tıis.
Jalpy, Qazaqstan EYDU-nyń Halyqaralyq ınvestısııalar jáne kópultty kásiporyndar týraly Deklarasııasynyń qaǵıdattaryn ustanyp kele jatyr.
Erlan Jaqypov,
Prezıdent janyndaǵy QSZI jahandyq ekonomıka jáne turaqty damý bóliminiń basshysy