Búgin Májilis Mádenıet jáne aqparat mınıstrligi ázirlegen arhıv isi boıynsha ózgerister men tolyqtyrýlar engizý týraly zań jobasyn birinshi oqylymda maquldady. Osy zań jobasyn ázirleý kezinde depýtattar respýblıkalyq memlekettik arhıvterge «ulttyq» mártebesin berý máselesin kóterdi, dep jazady Egemen.kz.
Elimizdegi 2 memlekettik arhıv mártebe berý krıterıılerine saı keletini anyqtaldy. Olar: Almaty qalasyndaǵy «Qazaqstan Respýblıkasynyń Ortalyq memlekettik arhıvi» jáne Astanadaǵy «Qazaqstan Respýblıkasynyń Ulttyq arhıvi».
Sonymen qatar jergilikti atqarýshy organdardyń arhıv isi salasyndaǵy eńbek qatynastaryn retteý boıynsha quzyreti keńeıtiledi. Endi ákimdikter aýyldardaǵy jumysy úshin qosymsha aqy alýǵa quqyǵy bar arhıv qyzmetkerleri tizimin anyqtaı alady.
Sondaı-aq, Qazaqstanda qujattardyń biryńǵaı elektrondy arhıvi aqparattyq júıesi engiziledi.
Bekitilgen zań jobasy arhıv qujattaryn qalyptastyrý, saqtaý jáne paıdalaný salasyn quqyqtyq retteýdi keńeıtedi. Atap aıtqanda, tájirıbelik-konstrýktorlyq jáne qala qurylysy qujattamasy, qoljazbalar, sýretter, syzbalar, kúndelikter, hat-habarlar sııaqty materıaldardy saqtaý jáne paıdalaný normalary ońtaılandyryldy.
Negizgi jańalyq «Qujattardyń biryńǵaı elektrondy arhıvi» aqparattyq júıesin engizý bolady. Ol barlyq sıfrlandyrylǵan arhıv qujattamasyn saqtaýdy jáne memlekettik jáne vedomstvolyq arhıvterdiń bıznes-prosesterin avtomattandyrýdy kózdeıdi.
Arhıvterde saqtalatyn azamattardyń derbes derekteri men jeke málimetterin qorǵaýdy qamtamasyz etý jónindegi memlekettik arhıvterdiń fýnksııalary naqtylanady.