21 qyrkúıek kúni elordada Qazaqstannyń eńbek sińirgen qaıratkeri, «Qazaqkonsert» kórkemdik jetekshisi Erlan Rysqalıdyń «Abai Lab» atty jeke shyǵarmashylyq keshi ótti, dep habarlaıdy Egemen.kz.
Uly oıshyl, aqyn ári aǵartýshy Abaı Qunanbaıulynyń 180 jyldyǵyna arnalǵan ádebı-mýzykalyq keshte kópshilik ulttyq dástúr men zamanaýı ónerdi toǵystyrǵan erekshe keshtiń kýási boldy. Bul keshtiń ereksheligi sol, ánshi ár ándi oryndamas buryn ol týyndynyń jurtshylyq bile bermeıtin tarıhyn aıtyp, kóp tyń derekti ortaǵa saldy. «Qazaqkonsertke» jınalǵan qaýymǵa kesh unaǵany sonshalyq, ánshiniń sońǵy áni oryndalǵanda da eshkim ketýge asyqpady. Rýhanı keshte Abaıdyń óleńderi men ánderin oryndaýdan bólek, uly aqyn tóńiregindegi ánshi-kompozıtorlar men sal-serilerdiń shyǵarmashylyǵy týraly biraz derek aıtyldy.
Rınat ZAIYT, Májilis depýtaty:
«Erlan Rysqalıdyń keshin kópten kútken tyńdarmannyń kóńilin aldamaǵan, kópirik emes, kórkem sózben áshekeılengen ádemi konsert boldy. Dana Abaıdyń zamanyna bir saparlap qaıtqandaı boldyq. Ár ánniń tarıhyn salmaqty sózben jetkizip, Aqan men Birjandy, Ýáıis Shondybaı men Shákárimdi, Muhamedjan men Ámireni, Júsibek, Keldenbaı, Sanaq, Tursynǵazylardy kórermenniń kóz aldyna ákelip , saǵynyshyn basty. Qudiretti Qazaq áni jasaı bersin! Erlan Rysqalıǵa alǵystan basqa aıtarymyz joq».
Álııa QANAShQYZY, ardager ustaz:
«Búgin «Qazaqkonsert» zalynda dástúrli ánshi, óner qaıratkeri, meniń shákirtim Jadyranyń jan jary Erlannyń «Abai Lab» atty shyǵarmashylyq keshinen keremet áser alyp qaıttym. Kórermenge ádebı tilmen Abaıdyń án qudiretin, kemeńgerligin jetkize bilgenine qaıran qaldym. Kishkentaı kezimnen ákemniń janynan qalmaı, talaı jıynnan, Abaı elinde bolyp jatqan toılardan qalmaıtynmyn. Halqymyzdyń ataqty ánshileri J.Elebekov, R.Baǵlanova, B.Tólegenova, M.Eshekeev t.b. týyndylaryn tyńdap óstim. Endi mine, sol óner ıeleriniń izin jalǵastyryp kele jatqan Erlan Rysqalıdyń shyǵarmashylyǵyn qyzyqtaý baqytyna ıe boldym».
Jeff GERSh, Nıý-Iorktan kelgen mýzykant:
«Erlan Rysqalıdyń Abaıdyń 180 jyldyǵyna arnalǵan án keshin tamashalaý men úshin úlken qurmet. Erlannyń aıryqsha oryndaý sheberligi jáne onyń dombyranyń qulaǵynda oınaýy keremet áser qaldyrdy jáne boıyma shabyt syılady. О́zim dombyra shertýdi úırenip júrgendikten, Qazaqstanǵa kelgen betimde mundaı sıpattaýǵa sóz jetpeıtin, erekshe konsertterdi tamashalaýdyń men úshin mańyzy zor».