Jaqynda Qazaqstannyń Kanadadaǵy elshisi Konstantın Jıgalov kanadalyq Nıý-Bransýık provınsııasynda saparmen boldy, dep habarlady SIM baspasóz qyzmeti.
Frederıkto qalasyna sapary barysynda K.Jıgalov provınsııanyń gýbernatory Djoselın Roı Venomen kezdesti, sondaı- aq, Nıý-Bransýık premeriniń orynbasary Stıven Horsmenmen, tabıǵı qorlar, energetıka jáne taý-ken óndirisi mınıstrlikteriniń basshylyǵymen, «OpportunitiesNB» agenttiginiń jetekshiligimen, Sent-Djon qalasy portynyń ákimshiligimen jáne provınsııanyń basqa da ókilderimen kelissózder júrgizdi. Sapar Kanadanyń halyqaralyq saýda-ekonomıkalyq jáne gýmanıtarlyq baılanystarynda mańyzdy róli bar kanadalyq provınsııalarmen Qazaqstannyń yntymaqtastyǵyn tereńdetýdiń bolashaǵy zor ekenin rastady. Taraptar energetıka, bilim berý, shaǵyn jáne orta bıznes deńgeıinde jańa ózara tıimdi baılanys ornatýdyń qajettiligin atap ótti. Elshilik jaqynda osy maqsatta elimizdiń ekonomıkasyna jańa ınvestısııalar tartýdy kózdegen Qazaqstandaǵy ekonomıkalyq múmkindikter týraly iskerlik anyqtama basyp shyǵardy. Astanada ótetin EKSPO-2017 halyqaralyq mamandandyrylǵan kórmesi, sondaı-aq, Prezıdent Nursultan Nazarbaev jarııalaǵan «100 naqty qadam» Ult jospary Nıý-Bransýık ókilderiniń eleýli qyzyǵýshylyqtaryn týdyrdy.
«Egemen-aqparat».
Sýret: http://kapital.kz/