Bala da jas shybyq sekildi. Jas shybyqty qalaı ıse solaı ósetindigi sııaqty, ár bala aldymen otbasyndaǵy tárbıemen jetiledi. Árıne, qorshaǵan orta, qoǵamdaǵy damý úrdisiniń de áseri tıetini daýsyz. Degenmen, ata-ana baqylaýynda bolǵan, otbasylyq qundylyqtarmen tárbıelengen jas urpaqtyń ómirden óz ornyn tabatyny dáleldeýdi qajet etpeıtin shyndyq ekenine eshkim daý aıta qoımas. Jas urpaqtyń bilimdi, sanaly bolýyna bilim ordalaryndaǵy ustazdar tárbıesiniń de yqpaly zor. Osylaı desek te, búgingi jas býynnyń arasynda mezgilsiz ýaqytta kóshe kezetin, tipti buzaqylyq jasaýǵa, ishimdik ishýge beıim turatyny da joq emes. Buǵanasy qata qoımaǵan jasóspirimderdiń mundaı júgensiz áreketke boı aldyrýynyń sebebi nede?
Gazet tilshisiniń osy saýalyna oraı oblystyq bilim basqarmasy qosymsha bilim berý jáne tárbıe jumysy bóliminiń basshysy Almagúl Qaıyrlıeva «Bul aldymen, ata-ananyń bala tárbıeleýdegi mindetin oryndamaýynan týyndaıdy» degen pikirimen bólisti. Oǵan dálel retinde keltirgen derekterin saralar bolsaq, jyl basynan bergi alty aıda quqyq qorǵaý organdarymen birlese júrgizilgen reıd barysynda kámeletke tolmaǵan 2000-nan astam jasóspirimniń ishki ister bólimine ákelingenin aıtýǵa bolady. Olardyń kópshiliginiń túrli quqyq buzýshylyq jasaǵany anyqtalyp otyr. Kámeletke tolmasa da qoǵamdyq oryndarǵa masań kúıde kelýi, sol sııaqty olardyń alkogoldik ishimdikterdi ishýine qatysty 24 derek tirkelip, bulardyń ata-analary ákimshilik jaýapkershilikke tartylypty. Oblys boıynsha ishki ister organdarynyń profılaktıkalyq baqylaý esebinde 400-den astam kámeletke tolmaǵan jáne 227 qolaısyz otbasy esepke alynypty. Kámeletke tolmaǵandardy beıimdeý ortalyǵyna 84 jasóspirim ornalastyrylypty. Osy derekterdiń ózinen bala tárbıesine jaýapty ata-ana tarapynan baqylaýdyń álsiregeni baıqalady. Tipti, keı ata-analar tańǵy 6-ǵa deıin kámeletke tolmaǵan balasynyń qaıda júrgeninen beıhabar bolatyn sekildi. Áıtpese, quqyq qorǵaý organdary 1372 kámeletke tolmaǵandardyń zańdy ókilderiniń ertip júrýinsiz turǵyn-jaıdan tys jerde saǵat 23-ten tańǵy 6-ǵa deıin bolǵandyǵyn anyqtamas edi. Buǵan qosa 66 jasóspirim de túngi mezgilde, ıaǵnı, saǵat 22-den tańǵy 6-ǵa deıin oıyn-saýyq mekemelerinde kóńil kótermes edi. Osyndaı jasóspirimder eńbekti qanaý problemasyna ushyrap júrmeı me? Kókeıdegi osy saýalymyzdy Almagúl Qaıyrlıevaǵa qoıǵan edik. Onyń pikirinshe, 1-12 maýsym aralyǵynda «Bala eńbegin qanaýǵa qarsy 12 kún» taqyrybynda túrli sharalar ótipti. «Oqýshylar men ata-analar arasynda balalardyń quqyqtyq saýattylyǵyn arttyrý» jáne «Bala eńbeginiń eń nashar túrleri, problemalary jáne balalardy satýdyń aldyn alý» taqyryptarynda uıymdastyrylǵan onlaın rejıminde sabaqqa oqýshylar, ata-analar men pedagogtar qatystyrylǵan. – Oblystaǵy bilim berý uıymdary, ishki ister bólimi jáne qoǵamdyq birlestikter ókilderiniń qatysýymen reıdter uıymdastyryldy. Reıd kezinde qoǵamdyq jáne kóńil kóterý oryndary baqylaýǵa alynyp, bala eńbegin qanaýǵa baılanysty quqyq buzýshylyqtar anyqtalǵan joq. Sonymen qatar, kámeletke tolmaǵandardyń quqyqtaryn qorǵaý jáne olardyń isteri jónindegi komıssııaǵa 75 qujat joldandy, – deıdi Almagúl Qaıyrlıeva.
Joldasbek ShО́PEǴUL, «Egemen Qazaqstan».
ATYRAÝ.
Sýret: http://press.mediaovd.kz/