Tań atpaı: «Tıtovta» turǵyn úıdiń qabyrǵasy qulady. Bir adamdy basyp qalypty», degen aqparat jeldeı esti. «Tıtov» degenińiz Qyzylorda qalasynyń bir shaǵyn aýdany. Onda eski úılerdiń bary da ras edi. Onyń ústine osydan birer kún buryn atalǵan shaǵyn aýdandaǵy №16a úıdiń turǵyndary oblys ákimine kirip, baspanalarynyń jaǵdaıyn da aıtqan. Qulaǵan da osy úı kórinedi.
Bul úı 1971 jyly salynypty. Alǵashynda turǵyndarǵa jataqhana retinde berilgen 5 qabatty ǵımaratta 123 páter bar eken. О́zi salynǵannan bastap jóndeý kórmegen. Osydan eki jyl buryn júrgizilgen tekserý barysynda turǵyn úı apatty dep tanylǵan. Degenmen, qabyrǵalarynyń áli de jaramdy ekeni aıtylǵan. Qysqasy, «qabyrǵa opyrylyp qalypty» degenge senetindeı-aq jaǵdaı.
Turǵyn úıde keleńsiz jaǵdaıdyń oryn alǵany ras eken. Úıdiń tóbesine adamdar shyqqan. Sol kezde tóbeden kirpish qulaǵan. Osynyń saldarynan eki qabat áıeldiń densaýlyǵyna qaýip tóngen. Kýágerlerdiń aıtýynsha, tóbeden qulaǵan zattyń biri áıeldiń ústine tússe kerek. Oqıǵa ornyna polısııa, jedel járdem qyzmetkerleri dereý jetken. Tótenshe jaǵdaılar jónindegi qyzmettiń adamdary da barǵan. Úsh adam aýrýhanaǵa jetkizilgen. Dárigerler olarǵa tıisti kómek kórsetip, densaýlyqtaryna eshqandaı qaýiptiń joq ekenin aıtady. Al aıaǵy aýyr kelinshek «Ana men bala» ortalyǵyna jetkizilgen. Tıisti mamandardyń qaraýyna berilgen. Shyndyǵynda, «Tıtov» shaǵyn aýdanynda birneshe apatty úı bar. Apatty jaǵdaıdaǵy úıdiń turǵyndary úshin jańadan baspana salynyp ta jatyr. Onyń alǵashqysy paıdalanýǵa berildi. Onda 24 otbasy ornalasty. Al keler jyldyń naýryz-sáýir aılaryna qaraı 60 páterli taǵy bir turǵyn úıdi el ıgiligine berý josparlanǵan. 2016 jyldyń sońyna qaraı apatty jaǵdaıdaǵy baspananyń turǵyndary úshin 100 páterli turǵyn úı salynyp bitedi. Qysqasy, aımaq basshylyǵy atalǵan jaǵdaıdan jan-jaqty habardar jáne ony sheshýdiń joldaryn áldeqashan bastap ketken. Tek merzimi kelmeı jatyr.
Erjan BAITILES, «Egemen Qazaqstan».
QYZYLORDA.