Búgin Qazaqstan ulttyq ekonomıka tarıhyna enetin mańyzdy qadam jasady. Álemniń jetekshi derjavalarynyń tájirıbesine súıene otyryp, elimiz memlekettik krıptorezerv qalyptastyrýdy qolǵa aldy. Bul – qarjy turaqtylyǵyn kúsheıtip, Qazaqstandy jańa sıfrlyq ekonomıkanyń kóshbasshylarynyń qataryna qosýǵa baǵyttalǵan strategııalyq qural bolmaq.
Osy sheshimniń bastamashysy – Respublica partııasynan saılanǵan Májilis depýtaty Oljas Quspekov. Depýtat alǵash ret krıptoaktıvterdi eldiń altyn-valıýta rezervteriniń quramyna engizý múmkindigin qarastyrýdy usyndy. Ol mundaı qadam ulttyq rezervterdi ártaraptandyrýǵa, ekonomıkany jahandyq táýekelderden qorǵaýǵa, sondaı-aq qarjy júıesiniń ıkemdiligi men jańa múmkindikterin arttyrýǵa jol ashatynyn atap ótti.
Bastamaǵa Jasandy ıntellekt jáne sıfrlyq damý mınıstrligi men QR Ulttyq banki qoldaý bildirdi. Jańa qor quramyna álemde moıyndalǵan negizgi sıfrlyq aktıvter — Bitcoin, Ethereum jáne strategııalyq rezervter retinde qarastyrylatyn basqa da jetekshi quraldar engiziledi.
Oljas Quspekov, Májilis depýtaty, Respublica partııasy:
«Qazaqstan sıfrlyq bolashaqty qýyp jetýshi emes, baǵyt berýshi bolýy tıis. Krıptorezerv – jaı ǵana ınnovasııa emes, ekonomıkany zamanaýı jáne turaqty etetin strategııalyq qalqan. Bul sheshim eldiń turaqtylyǵy men damýyna qyzmet etetin jańa qarjylyq ekojúıeni qalyptastyrýǵa jol ashady».
Mańyzdysy – krıptorezerv ulttyq valıýta – teńgeniń ornyna qoldanylmaıdy jáne tólem quraly bolyp tabylmaıdy. Ol dástúrli aktıvterdi tolyqtyrýshy element retinde áreket etip, memlekettiń qarjylyq turaqtylyǵynyń kepiline aınalady.
Qazaqstannyń krıptorezervin qurý – bul ınnovasııalyq ári ornyqty ekonomıkaǵa bet burý, elimizdiń ǵalamdyq arenadaǵy ornyn nyǵaıtý jáne sıfrlyq bolashaqqa daıyn ekendigin kórsetý jolyndaǵy mańyzdy qadam.