Astanada Kazakhstan Energy Week – 2025 aıasynda QR Prezıdenti janyndaǵy Sheteldik ınvestorlar keńesiniń energetıka, ekologııa jáne munaı-gaz salasy jónindegi jumys tobynyń taqyryptyq paneldik sessııasy ótti, dep habarlaıdy Egemen.kz Ǵylym jáne joǵary bilim mınıstrliginiń málimetine silteme jasap.
Prezıdent jarııalaǵan «Jumysshy mamandyqtary jyly» bastamasyna arnalǵan sessııaǵa memlekettik organdardyń, bıznes qaýymdastyǵy men akademııalyq orta ókilderi qatysty.
«Búginde biz bilim berý júıesi men eńbek naryǵy arasyndaǵy júıeli baılanysty qalyptastyryp kelemiz. Ásirese energetıka sııaqty strategııalyq mańyzy bar salalar úshin bul baǵyt óte ózekti. Ǵylym jáne joǵary bilim mınıstrligi ýnıversıtettermen jáne jumys berýshilermen birlese otyryp, sıfrlandyrý men «jasyl» tehnologııalardy engizý jaǵdaıynda jumys isteı alatyn jańa býyn mamandardy daıarlaýǵa baǵyttalǵan jańa bilim berý baǵdarlamalaryn ázirlep jatyr», dedi Ǵylym jáne joǵary bilim mınıstri Saıasat Nurbek.
Nazarbaev Ýnıversıtetiniń prezıdenti, doktor Vakar Ahmad energetıka salasynyń bolashaǵyn qalyptastyrýda tehnıkalyq jáne kásibı bilim berýdiń rólin atap ótip, memleket, bıznes jáne joǵary oqý oryndarynyń tyǵyz yntymaqtastyǵynyń mańyzdylyǵyn erekshe atap ótti.
Sondaı-aq qatysýshylar Qazaqstan energetıka salasynyń bolashaǵy adamı kapıtaldyń damýyna tikeleı baılanysty ekenin, al memleket, bıznes jáne bilim berý arasyndaǵy tıimdi sınergııa eldiń ornyqty ári ınnovasııalyq damýyn qamtamasyz etetinin atap ótti.