«Bizdiń basty maqsatymyz – ashyq, ádiletti jáne eń bastysy, árbir azamat úshin qoljetimdi densaýlyq saqtaý júıesin qalyptastyrý. 2026 jyldan bastap turmysy tómen azamattar jergilikti bıýdjetter esebinen medısınalyq saqtandyrý júıesimen qosymsha qamtylady. Osyndaı aýqymdy ózgeristerdi birlesip júzege asyrýǵa kúsh jumyldyrý kerek», dedi Oljas Bektenov.
Úkimet basshysy osy maqsatta Densaýlyq saqtaý mınıstrligine Eńbek mınıstrligi jáne óńir ákimdikterimen birge medısınalyq saqtandyrýdyń jańa tetigin engizý boıynsha úılesimdi jumys júrgizýdi tapsyrdy.
Sondaı-aq óńir ákimdikteri men Densaýlyq saqtaý mınıstrligi medısınalyq kómek sapasyn arttyrý boıynsha pármendi sharalar qabyldap, saqtandyrý júıesine jarna tóleýge qatysty mindettemelerdiń oryndalýyn qamtamasyz etýi qajet.
O.Bektenov halyqtyń áleýmettik osal toptary qataryndaǵy azamattardyń múddelerine erekshe nazar aýdarý kerektigin de atap ótti.
«Medısınalyq kómektiń qoljetimdiligi men sapasyna, tegin dári-dármekpen qamtamasyz etý máselesine qatysty alańdaýshylyq bildirgen azamattarǵa da qulaq asý qajet. Keıbir jańa erejelerdi túsiný qıyn. Sondyqtan árbir adam medısınalyq kómek alý tetikteri men ony jetildirý jumystarynan habardar bolýy kerek. Balalarǵa, zeınetkerlerge, múgedekter men azamattardyń basqa da jeńildikti sanattaryna medısınalyq kómek kórsetý tártibi men kólemi ózgerissiz qalýy tıis», dedi Premer-mınıstr.