Astanada «QR-nyń jańa Sý kodeksi jáne ony iske asyrý josparlary» atty oqý semınary bastaldy, 10 qazanda aıaqtalady. Negizgi maqsat – sý salasy mamandaryna jańa sý zańnamasyn jáne ony iske asyrý tetikterin túsindirý. Semınardy Sý resýrstary jáne ırrıgasııa birinshi vıse-mınıstri Nurlan Aldamjarov ashty, dep habarlaıdy Egemen.kz.
Atalǵan is-shara BUU-nyń Eýropalyq ekonomıkalyq komıssııasynyń, Eýropadaǵy Qaýipsizdik jáne Yntymaqtastyq Uıymynyń (EQYU), Germanııa Úkimetiniń Halyqaralyq klımattyq bastamasy aıasynda Memleketaralyq sý sharýashylyǵyn úılestirý komıssııasy (MSShÚK) ǵylymı-aqparattyq ortalyǵynyń, sondaı-aq Halyqaralyq sý resýrstaryn baǵalaý ortalyǵynyń qoldaýymen uıymdastyrylǵan.
Sala mınıstrliginiń málimetinshe semınar baǵdarlamasy tórt negizgi baǵyttan turady: memlekettik basqarý jáne strategııalyq josparlaý; sý nysandaryn qorǵaý jáne Sý kodeksiniń salalar boıynsha qoldanylýy; sondaı-aq eldi mekenderdegi sýmen jabdyqtaý men sý burý máselelerine arnalǵan bólim. Bul taqyrypty QR-nyń О́nerkásip jáne qurylys mınıstrliginiń mamandary qaraıdy.
EQYU-nyń Astanadaǵy Baǵdarlamalar ofısiniń sý resýrstary jáne tótenshe jaǵdaılar jónindegi mamany Nıǵmıat Nurtazanyń aıtýynsha EQYU-nyń Astanadaǵy Baǵdarlamalar ofısiniń negizgi baǵyttarynyń biri – elimizdiń sý resýrstaryn birtutas basqarý júıesin damytý.
«Osy maqsatta biz jańa Sý kodeksin ázirleý barysynda tehnıkalyq qoldaý kórsettik. EQYU Sý resýrstary jáne ırrıgasııa mınıstrliginiń bastamalaryn tolyqtaı qoldaıdy. Kodeksti beıimdeý, túsindirý jáne ony tájirıbede tıimdi qoldaný isine birlese atsalysyp kelemiz. Búgingi semınar osy yntymaqtastyqtyń aıqyn kórinisi. Sonymen qatar ofıs sý resýrstaryn birtutas basqarý salasynda birneshe jobany júzege asyryp jatyr. Bizdiń basty maqsatymyz – basseın ınspeksııalary men basseın keńesteriniń osy proseske belsendi qatysýyn kúsheıtý. О́ıtkeni dál osy qurylymdar sý resýrstaryn tıimdi basqarýdyń negizgi oryndaýshylary», dedi N.Nurtaza.
Esil basseın ınspeksııasy basshysynyń orynbasary Gúlden Ismagýlovanyń sózinshe jańa sý zańnamasy engizilgennen keıin, basseın ınspeksııalarynda, ıaǵnı bizde kóp suraq týyndap otyr, óıtkeni kodekste jańa baptar men jańa uǵymdar bar.
«Osy máselelerdi talqylaıtyn semınar uıymdastyrylǵanyna qýanyshtymyz. Is-sharanyń negizgi maqsaty – sý salasynyń turaqty damýyn jáne sý qaýipsizdigin qamtamasyz etýge baǵyttalǵan jańa sý zańnamasyn túsindirý», dedi G.Ismagýlova.