Zaısan aýdany Qarabulaq aýylyndaǵy Abaı atyndaǵy orta mektep Shyǵys Qazaqstan oblysyndaǵy baıyrǵy oqý oryndarynyń biri. Mekteptiń qurylǵanyna 90 jyldan asyp otyr. Osy ýaqyt aralyǵynda munda san myńdaǵan shákirtter tárbıelenip, olar elimizdiń damýyna óz úlesterin qosty. Kóptegen ǵalymdar men aqyn-jazýshylar, óner ókilderi, eńbek pen óndiris, sharýashylyq uıymdastyrýshylary, kásipkerler, sportshylar shyqty.
Solardyń qatarynda otandyq teledıdarda kóptegen qyzyqty baǵdarlamalardy ómirge ákelgen belgili telejýrnalıst, dramatýrg marqum Ádilbek Taýasarov, elimizge tanymal táýelsiz jýrnalıst Ermurat Bapı, oblysta kúrestiń damýyna kóp eńbek sińirgen sport jattyqtyrýshylary Janádil Ataev pen Erkin Ýanbaev, elimizge tanymal ánshiler Gúljibek Aıazbaeva men Dálel Ýásh, sahna sańylaǵy Jumabek Qunanbaev, aýyl óneriniń damýyna úlken úles qosyp kele jatqan Baǵdolda Turǵanbaev, О́skemen qalasynyń ákimi Temirbek Qasymjanov jáne basqalar bar. Mektepte kóptegen bilikti uztazdar jumys istedi. Sonyń ishinde ádebıet pániniń muǵalimi, oblysqa, aýdanǵa aty belgili ataqty ustaz marqum Mákesh Áýkebaev kóp eńbekpen mekteptegi Abaı murajaıyn quryp, ony uly aqynǵa qatysty jádigerlermen, muraǵat qujattarmen jabdyqtap, sońynda óshpesteı iz qaldyrdy. Bul mekteptiń úlgi etýge turarlyq dástúrge aınalǵan jaqsy bir tájirıbesi – mektep pen ony bitirgen túlekter arasyndaǵy baılanystyń ornyqty jolǵa qoıylǵandyǵy. Munda jyl saıyn mektep bitirgenderine 20, 30, 40 jyl tolǵan túlekter jınalyp, 4-5 kún boıy sport, óner dodalaryn uıymdastyryp, ushqan uıalaryna demeýshilik kómekterin kórsetedi. Mine, shırek ǵasyrǵa jýyq ýaqyttan beri osy berik dástúr turaqty jalǵasyn taýyp keledi. Otanymyzdyń ár jerinde eńbek etip jatqan mektep túlekteriniń bir kisideı bas qosyp, elge kelýi – aýyl halqy, mektep ujymy úshin uly mereke. Mektep kúni merekesi alǵash ret 1991 jyly atalyp ótilip, sol jolǵy kezdesýge mektepti 20 jyl buryn bitirgen túlekter shaqyrylǵan edi. Kezdesýge kelgen túlekter ózderiniń uıymshyldyqtary, ómirdegi tabystarymen jas urpaqqa úlgi-ónege bolyp, týǵan aýyldarynyń, mektepteriniń mártebesin bir kóterip tastaǵan bolatyn. Sol sátti bastama turaqty jalǵasyn tapty. Nátıjesinde Mektep kúni merekesiniń mańyzy men qamtıtyn máseleleri jyldan-jylǵa jańa qyrynan óris alyp, mekteptiń materıaldyq-tehnıkalyq bazasyn nyǵaıtýǵa kóp úlesin tıgizip keledi. Mektep túlekteriniń kómegimen bastaýysh synyptyń 5 kabıneti, mektep ashanasy jańa jıhazben jabdyqtalyp, teledıdar, kompıýter, kilem, tońazytqysh sııaqty qajetti zattarmen tolyqtyryldy. Keıingi jyldary jyl saıyn bir kabınet mektep túlekteriniń kúshimen jabdyqtalatyn bolyp júr. Máselen, byltyr ózderiniń 40 jyldyq kezdesýlerine kelgen О́skemen qalasynyń ákimi Temirbek Qasymjanov mekteptegi ınformatıka kabınetin kompıýterlermen tolyq jabdyqtap berdi. Túlekter qoldaýyna ıe bolǵan mektepte bilim berý isi de jaqsy jolǵa qoıylǵan. Mektep oqýshylary sońǵy úsh jylda pán olımpıadasy jeńimpazdarynyń sany jóninde aýdannyń otyzǵa jýyq mektebiniń arasynda orta eseppen alǵanda 4-shi oryndy turaqty ıelenip keledi. Máselen, mektep oqýshylary oblystyq pán olımpıadasynda hımııadan III oryn, ana tilinen II oryn, matematıkadan II oryndar alyp aýdan namysyn qorǵady. Ǵylymı joba qorǵaý saıystarynda únemi 3-4 oqýshy júldeli oryndarǵa ıe bolady. Máselen, oblys kóleminde 4 oqýshy II, III oryndarǵa ıe bolsa, respýblıka kóleminde 1 oqýshy III oryndy jeńip aldy. Oblystyq shyǵarmalar saıysynda 1 oqýshy I oryn, 2 oqýshy III oryndy ıelendi. Pán muǵalimderiniń aýdandyq saıystarynda hımııa páni muǵalimi Múnıra Jaqsylyqova 2 jylda II, III oryndardy jeńip alyp «Jyl muǵalimi-2013» qurmetti ataǵyna ıe boldy. Bastaýysh synyp muǵalimderiniń pán olımpıadasynda Názıra Qorabaeva II oryn, Baqytgúl Baıtoqanova III oryn, Sháıza Saǵymbaeva II oryn, fızıka páni muǵalimi Gaýhar Battalova II oryn, oblystyq til mamandarynyń saıysynda aǵylshyn tili páni muǵalimi Aıgúl Adan II oryndy, shaǵyn ortalyq tárbıeshisi Aıman Álimbaeva III oryndy jeńip aldy. 2009 jyly Abaı orta mektebi oblystyq «Eń úzdik aýla» saıysynda II oryn aldy. 2010 jyly mektep ujymy aýdan mektepteri arasynda ótken kórkemónerpazdar saıysynda bas júldeni, 2011 jyly I oryndy jeńip aldy. 2010 jyly mektep janynan Táýelsizdiktiń 20 jyldyǵyna arnalǵan aýmaǵy 1 gektar bolatyn botanıkalyq baq uıymdastyryldy. Ol baqqa О́skemen qalasynan aǵashtyń 24 túri ákelinip otyrǵyzyldy. Búgingi kúni baqtyń aýmaǵy 1,5 gektarǵa deıin ósti. 2011 jyly mektep janynan aýmaǵy 60 sharshy metr bolatyn jylyjaı salyndy. Onda qyzanaq, qııar, gúlderdiń ártúri ósirilýde. Jylyjaı ónimin oqýshylar mektep ashanasynda paıdalanady. Sonymen qatar, mektep janyndaǵy tájirıbe alańynda túrli baqsha ónimderi oqýshylardyń kúshimen ósirilip, onyń ónimderi mektep ashanasyna ótkiziledi. Jyl saıyn mekteptiń qosalqy sharýashylyǵynda kartop, oramjapyraq, sábiz, qyzylsha ósirilip, oqýshylardy tegin tamaqtandyrýǵa jumsalady. 2012 jyly aýdanda kógaldandyrý kórkeıtý jumystaryna arnalǵan obylystyq semınar ótti. Semınarǵa qatysqan oblys aýdandarynyń bilim bólimderiniń basshylary Abaı mektebiniń jylyjaıyn, botanıkalyq baǵyn kórip, tájirıbe almasty. 2013 jyly Abaı orta mektebi aýdandyq «Eń úzdik aýla» saıysynda bas júldeni jeńip aldy. 2014 jyly 8-9 synyp oqýshylary syrtqy baqylaý kezinde 59 paıyz bilim sapasyn kórsetti. Al mektep túlekteri UBT-dan 81,7 ball alyp, aýdan boıynsha 4-orynǵa shyqty. 2014 jyly mektepte tehnologııa jáne dene tárbıesi páni muǵalimderiniń aýdandyq semınary ótkizildi. 2014 jyly 7 qarasha kúni mektep ujymy mekteptiń qurylǵanyna 90 jyl tolýyn atap ótti. Bul merekege respýblıkamyzdyń túkpir-túkpirinen osy mektepti bitirgen túlekter men qyzmet istegen ustazdar shaqyryldy. Mektep túlekteri óz altyn uıalaryna mýzykalyq apparatýra, muzdatqysh, túrli-tústi prınter, akvarıým, kóptegen kitaptar, aqyn Abaıdyń bıýstin, shahmat, doıby taqtaıshalaryn, 20 balaǵa arnalǵan quny 360000 teńge turatyn kúres formalaryn jáne aqshalaı 379000 teńgeni tartý etti. Kelgen qarajatqa ujym músheleriniń sheshimi boıynsha qajetti qural-jabdyqtar alyndy. Bıyl Abaı atyndaǵy orta mektepte tarıh páni, ózin-ózi taný páni muǵalimderiniń jáne Uly Abaıdyń týǵanyna 170 jyl tolýyna arnalǵan aýdandyq semınarlar ótkizildi. Ol semınarǵa qatysqan aýyl okrýg ákimderi men mektep dırektorlary muǵalimderdiń ótkizgen ashyq sabaqtaryna, tárbıe saǵattaryna, dóńgelek ústel basyndaǵy ata-analarmen ótkizgen suhbattaryna qatysyp joǵary baǵa berdi.
Suńǵat ÁLIPBAI, «Egemen Qazaqstan».
Shyǵys Qazaqstan oblysy.