Kaspıı teńiziniń Quryq portynda parom kesheni salynyp, qurylysshylar kásipkerler men kásporyndarǵa jaǵalaýǵa shyǵýǵa múmkindik áperdi. «QTJ» UK» AQ bul jobany bıylǵy sáýirde ashqan bolatyn.
«Taıaýda arnaıy tehnıkalar sany 200-ge jetedi. Eki aýysymda jumys jasaýǵa bolady. Bıylǵy jylǵy josparymyzda temirjoldyń topyraq tósemin jasap, Quryq selosynan portqa deıin optıkalyq-talshyqty VL-110 kVt elektr jelilerin tartamyz. Ersaı stansasynan temirjoldyń kirme telimderin tóseımiz», deıdi jobanyń bas ınjeneri Marat Dúısenbaev. Búgingi tańda temirjoldyń portqa kirme telimderi tegistelýde. Munda 4 mıllıon tekshe metr jer qabatyn alý qajettiligi baıqalady. Qazirdiń ózinde qurylysshylar 1 mıllıon 150 myń tekshe metr topyraq shyǵaryp, jumystyń 30 paıyzyn oryndady. Jerdiń qatty qabatyn jarý tásilderi qoldanylýda. Quryq porty Aqtaýdan júz shaqyrym jerde ornalasqan. Sondyqtan da munda Borjaqty-Ersaı temirjol jelisi tóseldi. Jańa temirjol jelisimen alǵashqy jumysshy poıyzdaryn Memleket basshysy shildede jiberdi. Qazir bul jolmen qurylys zattary, parom keshenine qajetti aýyr qorapty qaýsyrmalar, basqa da taýarlar otandyq jáne sheteldik kásiporyndardyń suranysy boıynsha jetkizilýde. Taıaý arada Ersaı stansasynan Quryq portyna 14,7 shaqyrymdyq kirmejoldar salynatyn bolady. Bul jumystarmen qatar teńiz aýmaǵynyń tereńdigin zertteý jumystary da júrgizilýde. Ol jumystyń aıaqtalýyna baılanysty teńiz tabanyn qazýdyń ádisi qarastyrylady. Sonymen qatar, sý aıdynyn teńiz tolqyndarynan qorǵanysh quraldary batys bóliginde 1350 metrge, shyǵysynda 540 metrge ornatylady. Qurylysshylarǵa jumys istep, ýaqytynda tynyǵýyna qolaıly jaǵdaı jasalǵan. Vagondardyń ornyna 150 jumysshy men 40 ınjener tehnıkterge arnalǵan shaǵyn qalashyq salynady. Qazirdiń ózinde jaıly jataqhana, ákimshilik korpýs, ashana salynýda. Jylyna tórt mıllıon tonna júk ótkize alatyn parom kesheni halyq tutyný taýarlaryn, astyq, munaı ónimderi, suıytylǵan gaz, tyńaıtqysh, basqa da júkter tasymaldaıdy. Portty tolyq qýatynda iske qosý úshin 250 adam turaqty jumysqa qabyldanady.
«Egemen-aqparat».