Oblystaǵy 352 aýyldyq eldi mekenniń 232-si ǵana ortalyqtandyrylǵan aýyzsýǵa qosylǵan. Júzdegen aýyldyń halqy keshendi blok-modýlder men uńǵymalardyń sýyn tutynyp otyr.
Ertis-Baıan jeriniń aýyldarynda aýyzsý tarıfi – árkelki. Sońǵy jasalǵan taldaý qorytyndysy boıynsha Ýspen aýdanynda aýyzsýdyń eń arzan tarıfi tirkelgen, tekshe metri – 51,78 teńge. Eń qymbaty Aqsý qalasynyń aýyldyq aımaǵynda, tekshe metrine bekitilgen tarıf – 343,6 teńge.
– Oblysta aýyzsýdyń ortasha tarıfi 185,5 teńgeni quraıdy. 92 aýylda keshendi blok-modýlder ornatylǵan, 4 eldi mekende toptyq sý qubyry baǵanalary bar. Qalǵan 24 aýyl uńǵymalardaǵy sýdy paıdalanyp otyr, – dep málimdedi Pavlodar oblysy energetıka jáne turǵyn úı-kommýnaldyq sharýashylyǵy basqarmasynan.
Byltyr 37 myńnan astam halqy bar 44 aýylǵa jańa sý qubyrlary tartylǵan. Osylaısha, oblystaǵy aýyl turǵyndarynyń 98%-yna taza aýyzsý jetkizilgen. Bıyl aýyldyq jerlerde 32 ınvestısııalyq joba júzege asyrylyp jatyr. Basym baǵyttar – joldardy, sýmen jabdyqtaý nysandaryn salý. Jyl sońyna deıin 6 sý qubyrynyń qurylysy aıaqtalyp, oblystaǵy aýyl halqyn 100% taza aýyzsýmen qamtý josparlanǵan.
Oblystyq sanıtarlyq-epıdemıologııalyq baqylaý departamentiniń málimetinshe, byltyr ortalyqtandyrylǵan, oqshaýlanǵan aýyzsý kózderinen 1559 synama alynyp, onyń 62-sinde mıkrobıologııalyq, sanıtarlyq-hımııalyq kórsetkishter normaǵa saı bolmaı shyqqan. Departament mamandary aýdan-qalalardyń ákimderine, aýyzsýmen qamtý mekemelerine sý qubyrlaryn únemi shaıyp, súzgilerdi aýystyryp otyrý kerektigin eskertedi.
Pavlodar oblysy