Qyzylorda qalalyq prokýratýrasy jaqynda júrgizgen zertteý jumystarynyń qorytyndysynda jer telimderin belgili bir maqsatpen alǵan keıbir azamattar arasynda óz mindettemelerine jeńil-jelpi qaraıtyndardyń jetkilikti ekenine kóz jetkizdi. Atalmysh reıdke sonymen qatar, oblystyq ekologııa departamentiniń, oblystyq jerdiń paıdalanylýy men qorǵalýyn baqylaý jáne qalalyq ishki ister basqarmalarynyń, qalalyq jer qatynastary bóliminiń qyzmetkerleri de qatysty.
Prokýratýra qyzmetkerleri aldyna qala aýmaǵynda keń taralǵan paıdaly qazbalardy jeke jáne zańdy tulǵalardyń óz betterinshe óndirý, jer qoınaýyn zańsyz paıdalaný derekterin anyqtaý, olardyń ekologııalyq zańnamalar talaptaryna jaýap berýleri jaılaryn tekserý qoıyldy. Al buǵan qadaǵalaýshy jáne ýákiletti memlekettik organdar tarapynan bul baǵytta júrgizilgen is-sharalarǵa qaramastan, mundaı faktilerdiń jıilep ketýi negizgi sebep bolǵan. Syrttaı zertteý nátıjesinde jeke kásipker Q.Shalqybaevtyń Aqsýat aýyldyq okrýgi aýmaǵyndaǵy ózindik kásipkerlikti júrgizý úshin alǵan jer ýchaskesin nysanaly maqsatyna paıdalanbaı, onda saz kareri men qysh zaýytyn ashyp alǵany anyqtaldy. Osy tektes derek Mahanbetov aýylynda da kezdesti. Osynda turatyn jeke tulǵa M.Kóptaev ta «Taldyaryq» óńirinde ózindik kásipkerlikti dóńgeletip áketýge berilgen 2 jer ýchaskesin kirpish óndiretin alańǵa aınaldyryp jibergen. Kirpish quıyp, kúıdiretin tirlikke «Eldos» sharýa qojalyǵynyń jetekshisi A.Júsipbekov te barǵan. Ol Aqsýat aýyldyq okrýgi, Besaryq óńirinde sharýa qojalyǵyn júrgizbek bolyp alǵan jer ýchaskesin osylaı zańsyz paıdalanǵan. Mundaı óndiris oryndarynyń qala ekologııasyna keri áser etetini de anyq. Budan bólek, jeke tulǵa G.Qyrǵabaqova ońtústik óndiristik aımaǵyndaǵy kommersııalyq maqsattaǵy jer telimin nysanaly tirligine saı paıdalanbaı, qum-topyraq karerine aınaldyryp alypty. Al «Qumkól» tas jolynyń oń jaq qaptalyndaǵy jer ýchaskesinen M.Qýanyshbaev, «Samara-Shymkent» tas joly boıyndaǵy kópirdiń janynan A.Taımanov syndy azamattar paıdaly qazba – qumdy zańsyz qazyp, onyń tıeý jumystaryna den qoıǵan. Atalǵan zańsyz áreketterge baılanysty zańda belgilengen barlyq sharalardy kórý úshin ýákiletti organdarǵa prokýrorlyq yqpal etý aktileri engizildi. Qazir osy tarapta jumystar júrgizilýde. «Jalpy, osy tektes zertteý jumystary qalalyq prokýratýramen ári qaraı jalǵasyn taýyp júrgiziletin bolady», – dedi osy oraıda oblystyq prokýratýranyń baspasóz hatshysy Botagóz Seıil.
Rýslan IGILIK. QYZYLORDA.